WILLEMSTAD – E Kolegio Supervishon Finansiero (College financieel toezicht - Cft) a aprobá presupuesto 2008 di Saba. Konseho Insular di Saba a trata e presupuesto djabièrnè 7 di mart i a aprobá esaki unánimamente i sin hasi kambio na dje. Awe e Kolegio tambe a aprob’é. Awor ku e proseso aki a finalisá, e teritorio insular por bai ehekutá e presupuesto.
Ku esaki Saba ta e promé di e islanan BES (Boneiru, St. Eustatius i Saba) di kua Cft a aprobá su presupuesto. Saba a traha diligentemente, ya ku e teritorio insular aki tabata e promé tambe ku algun siman pasá a optené un konseho positivo di Cft riba su konsepto di presupuesto. Kontrali na e prosedura normal, e trayekto pa prepará e presupuesto e biaha aki a tuma lugá den e aña di e presupuesto mes, pues den e kaso aki den aña 2008. E Dekreto supervishon finansiero provishonal BES, ku ta preskribí e kuadronan dentro di kua e islanan BES por move, a keda formalisá te fin di aña pasá. Kada isla ya tabata disponé di un presupuesto ku a ser aprobá kaba dor di su Konseho Insular, pero ku ainda no tabata kumpli ku e eksigensianan di e Dekreto. Miéntras tantu e presupuesto di Saba awor si ta kumpli ku e eksigensianan aki.
Cft ta konsiderá e logro aki mashá alentador. Pa Saba esaki ta nifiká e promé paso konkreto na finansa públiko mas sano. E próksimo paso importante ta entrega di kuentanan anual 2006 i 2007, kompañá pa nan deklarashon di akountent. E informashon den e kuentanan aki lo duna indikashon fuerte di e haltura di e entrada i gastunan ku por spera riba e isla aki. E presupuesto di 2009 pues lo por ser basá riba sifranan mas real i mas resien. Aki dos luna ta kuminsá ku e promé aktividatnan rondó e preparashonnan di e konsepto di presupuesto 2009 pa tur e islanan BES.
Sinembargo ehekushon di e presupuesto na un forma adekuá, ta mesun importante ku e presupuesto mes. Ku esaki ke men e maneho finansiero: e proseso di hasi kompromisonan finansiero, hasi pago i risibí entrada. Tur e asuntunan aki tambe ta ser evaluá pa Cft. Pa e motibu aki e isla lo bai tin un kuenta bankario on-line serka Cft, loke ta hasi posibel pa sigui tur transakshon di aserka. Un otro aspekto importante ta e atministrashon. Cft, den koperashon ku Saba, lo bai invertí hopi tempu den esaki tambe próksimamente, asina e Kolegio a informá awe.