WILLEMSTAD - Ulanda a aprobá e promé presupuesto di e islanan BESS. Ta trata aki di e presupuesto di Saba. Ku esei, Saba a bira e promé isla tambe ku ta kumpli kabalmente ku e palabrashon hasi ku Ulanda enkuanto maneho finansiero di e isla, asina Ray Thuis, miembro di e Kolegio pa Supervishon Finansiero (Cft) a konfirmá.
E presupuesto ta kuadra ku reglanan ku nos a establesé, asina el a agregá.
Manera ta konosí, parti di e kombenio ku e islanan chikitu a sera ku Ulanda riba maneho finansiero ta ku pa nan por haña e sosten ulandes pa nan presupuesto, e presupuesto mester ta entregá na tempu i kuadra ku e filosofia ku den un periodo determiná, mester eliminá eventual défisit ku ta eksistí.
Ku esaki, manera tambe ta konosí kaba, e obligashon di gobièrnu antiano pa kumpli ku e islanan aki, atraves di un kontribushon den e Fondo di Solidaridat tambe a kaduká. Ulanda mes lo kubri e parti ei.
E presupuesto ta abarká un montante di 20 mion florin. Originalmente e montante tabata 28 mion florin, pero despues di un análisis mas kritiko, a sali na kla ku lo ta masha difísil pa e isla haña entrada na e altura ei.
E défisit ta 2 mion florin, originalmente 9 mion. Den un periodo di tres aña, mester eliminá e défisit di 2 mion aki, segun Thuis a trese dilanti.
El a mustra ku e presupuesto ta duna Saba libertat pa aktua.
Ulanda no ta preskribí na unda mester ekonomisá, unda mester kòrta, pasobra esei ta Saba mes ta determiná.
“Esei pues ta nifiká ku e no ta nifiká ku niun proyekto spesífiko mester para. Un proyekto importante pendiente ta e aeropuerto di e isla. Ta Saba mester hasi su eskoho,” asina Thuis a indiká.
El a agregá, ku esei lo bira un tarea di Konseho Insular i Bestuurscollege di e isla.
Saba a bira pues e promé isla ku ta kumpli. Den kaso di Boneiru, kosnan no a kana korekto. Boneiru no a kaba su presupuesto na tempu, di manera ku mester bai wak awor kiko ta pasa.
Thuis a bisa ku el a komprondé ku entretantu gobièrnu di Boneiru ta trahando intensivamente riba nan presupuesto.
“Boneiru no a tira sèrbètè den rin, manera hopi biaha nos a tende último tempu. Hecho ta ku e presupuesto aki mester ta kla i entrega pa Konseho di Minister di Reino por trat’é dia 28 di mart awor. Si e presupuesto no ta kla na tempu, Kolegio pa Supervishon Finansiero tin un variante kla kaba pa e mes entrega,” Thuis a sigurá.
Boneiru mester tin un presupuesto aprobá pa dia 31 di mart awor, Thuis a agregá.