Falta un par di dia mas pa nos drenta siman Santo, na mundo un siman hopi respeta door di tur cu ta un bon Cristian. Nos ta cabando cu e era di cuaresma cu pa hopi hende rond mundo ta un temporada hopi importante. Awe ta bon pa nos reflexiona ariba e dos fiestanan hopi grandi cu nos conoce como Cristian. Esun prome y nos por bisa esun cu nos ta sera aña cune ta Pasco di Nacimento. Pasco di nacemento ta un fiesta familiar, na unda e union familiar na prome instante ta hopi importante.
Ya for di basta luna prome cu e fiesta importante aki, famianan ta cuminsa pa drecha nan hogar, esta nan cas, cu verfmento, docoracion, trahamento di ayaca etc. Ta pensa con pa come hunto, con pa bishita famia y conocirnan. Ta purba di busca paz na unda esaki por ser alcansa. Ta un temporada hopi bunita y importante den bida di cada ser humano, pero especialmente di un famia completo. Canticanan hopi bonita ta keda composita, cu palabranan cu ta alimnenta alma y curpa di cada ser humano.
Awor si nos papia di Pasco di Resureccion, anto aki nos ta pensa ariba nos propio bida, aki e ser humano ta haya e oportunidad pa dedica mas di 40 dia largo ariba su propio bida. Aki ta na unda e cas personal, e persona, su alma, mente y corason ta keda limpia y prepara pa un temporada asina importante. Aki ta na unda nos ta haya e oportunidad unico pa nos por repasa nos propio bida, pero repasa di berdad y para keto un rato, especialmente na unda nos ta kere cu nos a comete errornan cu a causa nos propio persona daño y cu a keda reflexiona ariba bida di e sernan cu tin un contacto directo cu nos, esta nos famia.
Nos como sernan humano no ta acepta cu nos tin cierto fayonan, ta mas facil tira esakinan ariba i otronan, cu mira esnan di nos y aki ta na unda e 40 dianan aki mester por a sirbi pa nos por reconoce dilanti nos Señor tur cosnan cu ta haci nos bida un bida yena cu dolor y sufrimento. Señor hamas ta nenga di yuda su yiunan, pero mas bien ta cla pa duna su man amigo, pasobra mas alma cu keda salba, ta un bendicion pa nos mes un curpa y ta un alegria grandi pa nos Salbador. Señor no kier perde ningun di su yiunan, pero mas bien ta haci tur loke e por, kisas pa medio di mensahenan, su Santa Biblia, articulonan cu nos ta lesa, peliculanan educativo, pa duna nos e siñal cu ta tempo pa cambionan grandi mester por presenta den nos bida, cual ta e bida precioso cu Señor a regala nos.
Cu un complimento asina nos ta haci bida di nos sernan humano stima mucho mas facil y agradabel y nos lo ta e ehempel palpable pa nan, pa asina nan tambe lo sigui nos ariba e caminda di amor y paz, cu ta esun di nos Señor poderoso.
Nos tur mester por sinti cu cambionan grandi ta presenta pa mehora nos bida y esunnan di nos sernan stima. Semana Santo ta e siman clave den bida di cualkier Cristian, ta e momento pa busca e berdadero paz cu mester renace y permanece den nos corason. Nos mester por confesa dilanti nos guia spiritual, pa haci nos mucho mas transparente. Nos mester participa na actonan religioso. Nos mester por sinti cu ariba e Diabierna Santo, nos ta willing pa laga tur cosnan malo bai y sali for di nos, na momento cu nos ta recorda morto di Cristo y nos mester ta prepara pa nos por ta un persona nobo y renoba ora cu nos ta celebra Pasco di Resureccion. Ta momentonan di hopi alegria, ora cu nos por sinti e paz cu nos propio consenshi. Cu nos cas, esta nos curpa ta uno limpi y entrega na Señor. Un persona cu ta biba cu Cristo, ta un persona bendiciona, ta un persona hopi agradabel, ta un persona transparente, ta un persona cu ta pordona, cu no ta rabia liher, ta un persona cu ta cla pa yuda y ta un persona cu ta duna balor na su mes y sa pa duna otronan e respet cu nan merece.
Ojala cu e dianan nos dilanti ta dianan yena cu bendi cion pa nos tur y pa henter nos pais. Un suplica ta bai na nos politiconan, nos medionan di comunicacion, mayornan, maestronan, ban tur yuda pa asina nos por conoce un siman di berdadero reflexion y cu Pasco di Resurecion lo trece hopi cambionan faborabel pa nos mes, pa nos famia y henter nos comunidad.
Diabierna Santo lo sali e acostumbrado peregrinacion for di mi residencia, Catiri 5 na Tanki Leendert, pa 4:45’or a.m. pa Kapel di Alto Vista. Mi ta invita tur Cristiannan pa bin cana cumi pa asina nos por reza pa cada un cu ta participa na e peregrinacion, pa nos hobennan, pa nos famianan, pa tur esnan cu ta tuma desicionnan cu ta trata e futuro di nos pais stima.
Atan Lee, boso humilde sirbidor.