ORANJESTAD- Un guante di boxeo a ser colga como recuerdo Dialuna mainta 10 di Maart 2008 momento cu Dios a yama den su reino un gran Arubano cu a dedica tur su bida na boxeo amateur,professional y internacional.
Ta trata aki di Sr. Mateo Efigenio Kock, mihor conoci como “Fenchi” un homber di deporte tanto den boxeo como futbol.
Sr. Fenchi Kock a nace dia 25 di November 1925 (82 anja) y a fayece Dialuna mainta na su cas Savaneta 361 despues di tabata hopi dia malo.
Dios a manda jama Fenchi pa gradici’e pa tur loke el a haci pa Aruba riba tereno deportivo.
Fenchi tabata un bon futbolista y a limita den Union Santa Cruz y Tricolornan di Solito R.C.A.
Debi na un accidente di auto el a retira di futbol y a dedica su mes na boxeo amateur y profesional como entrenador.
Fenchi a sirbi servicio militar “Schutterij” na Aruba durante segundo guera mundial.
No solamente Sr. Fenchi Kock tabata entrenador di boxeo pero el a funda Aruba Boxing Association pa asina Aruba haya reconocimento internacional pa boxdonan di Aruba por a competi internacional y e mes na varios ocasion a bay exterior cu boxdonan pa defende nomber di Aruba exitosamente.
Tur su bida el a dedica na boxeo, entrena un cantidad di hobennan cu a bira grandi den boxeo local y internacional. Tur dia Sr. Fenchi Kock tabata entrena boxdonan amateur y profesional, sea na Santa Cruz, Savaneta, San Nicolas, Playa, Dakota, Noord y varios districto.
Pa menciona algun boxdo cu Fenchi a yega di yuda den boxeo sea como entrenador, den skina of cu conseho den boxeo, Juan Maduro, Efi Croes, Gerrit Croes, Mai Croes, Romualdo Croes, Reginaldo Curiel, Sugar Boy Nando, Battling Siki, Fenton, Nulfo Steba,
Pif Dania, rumannan Wester, Vrolijk, Ireno Werleman,Luis Giel, Nedd, Roly Croeze, Harry Croes, Renzo Richardson, y un cantidad di boxdonan cu a bin box aki na Aruba y varios alumnonan mas di boxeo.
Na anja 1981 Su Majestad La Reina a condecora Sr. Mateo Efigenio Kock pa su aporte na deporte y dedicacion na hubentud, boxeo, futbol y su servicio militar Schutterij cu Eremedaille di Ordo van Oranje-Nassau.
Fenchi ta laga atras su querida esposa Carmen, su jiunan Edwin Kock y famia y Ruwin Kock y famia.
Acto di entiero di Fenchi ta tuma lugar majan diahuebs 13 di maart pa 4’or atardi saliendo for di misa Imaculada Concepcion pa Santana catolico na Santa Cruz.