ORANJESTAD - Cu sumo placer Comision Organisador di Premio Promocional Santa Anna ta anuncia e ganador di dicho premio pa aña 2008. E aña aki e premio ta bai pa Grupo Uni di Centro di Bario Noord, un grupo di 25 ama di cas masha activo riba tereno social y cultural.
E grupo aki a ser funda dia 22 di maart 1978, bou guia di Sra. Glenda Gil, e tempo ei “stagiaire” na C.B.Noord. E grupo ta un grupo social, democrata, cultural cristian y tin su propio bandera, himno y logo. Fuera di organisa actividad pa nan propio menbrecia, nan ta masha activo riba tereno social.
Nan ta organisa actividadnan pa muchanan menos afortuna, pa muchanan cu desabilidad y pa personanan cu pa un motibo of otro ta den rolstul.
Ademas nan a yega di representa nos dushi Aruba riba tereno cultural na Corsou, Boneiro y Republica Dominicana. Tambe nan ta duna atencion na esnan di KIA (prison).
Pa mas di 20 aña caba nan ta sirbi tur invitadonan durante e celebracion di Himno y Bandera na St. Annaschool. Nan ta ehempel pa tur ama di cas aki na Aruba. Fuera di ta desempeña nan tarea di ama di cas, nan ta den sirbishi di comunidad di Aruba y di nan dushi bario di Noord en particular.
E aña aki, pa ser exacto 22 di maart, nan ta cumpli 30 aña di existencia. Ricibiendo e premio aki merecidamente, ta e mihor forma pa corona nan di 6 lustro.
Tambe e aña aki ta entrega un premio special na Sr. Eduardo(Eddy) Tromp, pa su aporte enorme na cultura musical di nos pais Aruba. Eddy a hasi hopi riba e tereno aki.
Si solamente pensa riba e programa radial Butishi di Alegria nos tin un idea con grandi e aporte di Eddy ta. Ta pesey mes Comision Organisador ta di opinion cu tanto Grupo Uni como Eddy mester ser honra pa nan grandisimo aporte.