WILLEMSTAD – Pa polis drenta den kas di un hende e mester tin un dokumentu di un wes komisario ku ta dun’é pèrmit pa e drenta. Sin e ‘last tot binnentreden’ akí e no por drenta si e no haña pèrmit di e doño di kas. Esaki ta loke abogado Nelson Navarro a splika LA PRENSA awe.
LA PRENSA a kombersá ku Navarro relashoná ku un kaso ku a tuma lugá djamars último, ora e polisnan di 0-Toleransia a drenta den un kas di famia sin ku nan a mustra e habitantenan e ‘last’ di wes komisario promé ku nan a drenta paden. Despues ku nan tabata den e kas pa algun ratu i a pone tur hende drumi abou, un di e polisnan a introdusí su mes komo fiskal ousiliar. Ora e doño di kas a puntr’é si e tin pèrmit pa drenta den e kas, un otro polis a saka un papel i ‘primi’ esaki den kara di e doño di kas. Ora e doño di kas a bisa e polis ku e no por a lesa kiko tabatin skibí, e polis a kontestá ku ta ‘mustra’ (tonen) so e tin ku ‘mustra’ e papel. Mes ora e polis ku a identifiká su mes komo fiskal ousiliar a kontestá ku ta esei ta e ‘last’.
Mas aleu Navarro a splika ku polis mester buska indikashonnan konkreto ku tin echonan kastigabel ta tuma lugá den un kas, promé ku nan por disidí nan drenta den e kas. “Despues di hasi investigashon, akumulá prueba i papia ku testigunan, polis por pidi un wes komisario un ‘last’ pa drenta den e kas en kestion. Solamente si ta trata di ‘heterdaad’, polis por drenta un kaminda sin e ‘last’ di wes komisario.”
Frederik Claret, ku ta doño di e kas kaminda polis a drenta djamars último, a konta LA PRENSA ku e tabata sintá ta kombersá ku su yunan i algun kolega di skol di e yunan. “Direpente nos a tende un bochincha ta bin for di parti dilanti di nos kas. Ora nos a bai dilanti nos a mira un grupo di polis ta buska moda di kibra e porta dilanti ku pata di kabra. M’a bisa nan warda mi ta habri e porta i mes ora mi yu hòmber a kore bai habri e porta. Na e momentu ei nan a drenta paden i manda tur hende sinta abou. Nan a manda sera boka i keda grita pa tur hende sinta abou. Te na e momentunan ei niun di e polisnan no a bisa kiko tabata e motibu di nan entrada.”
Mas aleu Claret a splika ku ora e polisnan a kaba di listra i no a haña nada, nan a bai for di e sitio. “Mes ora mi a bai dòkter ku e muchanan pasó nan tabata kompletamente troumatisá. Ora nos a kaba ku dòkter nos a bai warda polis grandi na Winston Churchillweg pa duna keho. Einan nan a bisa nos ku no tin niun hende mas na e departamentu di P.R. i ku nos mester bin bèk e siguiente dia. Ora mi a para’riba pa mi papia ku un hende, nan a yama un hefe di fam Celestina ku tambe a manda e respondi pa nos bin e siguiente dia. Finalmente mi a pidi pa papia ku un hende di e büró di ayudo pa víktima, pero nan a bisa ku e büró ta será kaba. Ora mi a keda insistí nan a yama un kolaboradó di e büró ku a bin papia ku nos. Despues di ei nos a bai nos abogado.”
E famia Claret a keda asina mal kontentu ku e suseso ku awe tardi pa 5’or nan ta tene un konferensia di prensa na Holiday Beach. Durante e enkuentro nan lo konta diferente kos mas ku no a sali den publisidat ainda.
Bosero di Polis Alto Inspektor Hermando Davelaar a informá LA PRENSA ku a base di informashon i indikashon ku polis tabatin, indikando trafikashon di droga i arma, nan a bai na e kas en kestion. Ora nan tabata kla nan a papia ku e doño di kas i a dun’é datonan, pa si tabata nesesario e lo por a tuma kontakto ku polis.