NEW YORK, - E mucha muhé a bandoná su kas na New Jersey ora e ta’tin 17 aña pa biaha bai New York i traha komo kantante di Rhythm & Blues na sentronan nokturno.
Awor na edat di 22 aña, inkonsientemente el a bira protagonista di e drama ku a pone Gobernador demókrata di New York, Eliot Spitzer, renunsiá.
Su nòmber ta Ashley Alexandra Dupré, i di akuerdo ku loke The New York Times a publiká den su artíkulo “E muhé meimei di kaida di Gobernador” yama “Kristen”, e prostituta di élite ku ta’tin enkuentronan ku Eliot Spitzer 13 di febrüari na Hotel Mayflower di Washington.
E hóben di New Jersey último dianan a keda den su apartamento na Manhattan, asina e korant neoyorkino a informá den su página di Internet.
Apénas djaluna último el a hasi aparishon na Korte federal, kaminda a asigná un abogado pasobra a pronostiká ku e lo ta testigu den e kaso kontra kuater persona akusá di operá un ret di prostitushon yamá Emperor’s Club V.I.P.
Den un entrevista telefóniko, Dupré a bisa ku el a drumi masha tiki último dianan debí na stress paso e ta involukrá den e kaso. “Mi no ke pa nan mira mi komo mònster”, e hóben a agregá.
Di su banda, Don D. Buchwald, abogado designá pa representá Alexandra, a hasi menshon ku a sita Dupré p’e testifiká komo parti di e investigashonnan, pero el a evitá papia di e dia ku e hóben a kuminsá traha pa Emperor’s Club i ki dia el a konosé e eks Gobernador Eliot Spitzer.
Den su página di Internet na MySpace.com, Alexandra Dupré a komentá ku “mi ta un mucha muhé ku ta biba pa muzik”.
Segun The New York Times, e dokumento hudisial den e kaso di prostitushon ta referí ku e dama, ku Emperor’s Club VIP tabata yama Kristen, tabata kobra mil dollar pa ora, i ta pon’e meimei di e eskala entre e prostitutanan di e establesimentu aki ku ta risibí pa nan servisionan asta 4.300 dollar pa ora.
Spitzer a reuní den mesun hotèl ku Bill Clinton ku Monica Lewinsky
Spitzer tin komo esenario e mesun ku esun di Bill Clinton i Monica Lewinsky a desaroyá: Renaissance Mayflower Hotel, simplemente konosí komo Mayflower, e hotèl di luho mas grandi di Washington D.C.
Mayflower Hotel ta’tin komo wéspet Reina Elizabeth, John Wayne, Barbara Streisand, Winston Churchill, Bob Hope.
Eks direktor di FBI, J. Edgar Hoover, a yega kome na un di e restorantnan di e hotèl kada dia durante 20 aña.
E echo ku Presidente Calvin Coolidge a ofresé e promé baile komo Presidente na 1925, esaki a bira tradishon ku e baile di bonbiní di un Presidente nobo ta tuma lugá na Mayflower Hotel.
Den e elekshon di 1996, a saka pòtrèt di Monica Lewinsky brasando e tempu ei Presidente Bill Clinton durante un evento di kampaña na e hotèl ei.
Tambe a bisa ku John F. Kennedy a usa instalashonnan di Mayflower den añanan ’60 pa su enkuentronan amoroso pafó di matrimonio.
Mayflower a keda konstruí pa Allen E. Walker i a inougur’é na 1925.
Ta bisa ku Mayflowerr tin mas oro den su instalashonnan ku kualke otro edifisio di e kapital merikano, ku eksepshon di Biblioteka di Kongreso. A remodelá Mayflower na 1988 i durante e obra a re-deskubrí adornonan ku a keda skondé durante e Gran Depreshon.

Foto: Ashley Dipre 1303

Imágen di Ashley Dupré, di 22 aña, optené 12 di mart 2008 fo’i MySpace webpage. “Mi no ke pa mira mi komo mònster”, Ashley a bisa.

Foto: Ashley Dupre 1 1303

MySpace webpage ta mustra Ashley Dupré identifiká pa papelnan di Korte komo “Kristen”.

Foto: Eliot Spitzer 1303

Eliot Spitzer ayera a anunsiá su retiro komo Gobernador den su ofisina na New York.