NESS CITY, Kansas, Merka, - Un muhé di 35 aña a pasa dos aña pegá den pòchi w.c. di su frei na Ness City, na Kansas, te ora servisionan di urgensia ku un palanka a sak’é for di e kas.
Segun korant lokal The Hutchinson News, frei di e dama, kende no a keda identifiká, na febrüari último a yama ofisina di polis na telefòn pa informá nan ku algu straño a pasa ku su frei, komishonado polisial Bryan Whipple a bisa.
Yegando na e kas, polisnan a enkontrá e dama sintá riba e pòchi, ku múskulonan ku ta muriendo, pasobra e no a move debí ku e ta pegá den e pòchi pa loke Whipple a deskribí komo “medionan natural”.
Polisnan a kalkulá ku e dama tin mas o ménos dos aña sintá riba e pòchi.
Su frei tabata dun’é kuminda i awa.
Servisionan di urgensia ku un palanka ta’tin ku ranka e asiento for di e pòchi.
“Ku un palanka nos a ranka e asiento, i e asiento a bai ku e dama hospital. A kita e asiento na hospital”, Whipple a deklará.
E frei a sigurá ku e dama tur tempu tabata riba e pòchi pasobra e tabata ke, i, den prinsipio, e sheriff a dun’é rason.
“Ku su aktonan parse ku e dama tabata apoyá loke e frei bisa, pasobra ora nos a enkontr’é el a ninga bai den ambulans”, Whipple a sigurá.
“P’e seriedat di e situashon, nos a yama ambulans di tur manera, pero e dama no kier a bai”, Whipple a agregá.
Aktualmente e dama ta hospitalisá na Wichita, pero e ta ninga papia ku outoridatnan.
Polisnan lokal awor ta studiando e posibilidat di presentá kargonan kontra e frei pa maltrato di un adulto dependiente, sperando ku un estudio sikiátriko ta aklará situashon mental di e dama i nivel di dependensia di su pareha.
Te na e momentunan aki, no a aklará e motibunan ku a pone ku e dama a keda pegá mas o ménos dos aña den e pòchi.