Lorito ta yama tur hende un felis djaweps. Lorito a bula, bula i bula pa nos konta kuantu hende tabata t’ei ayera. Nos a keda hopi desapuntá. Na lugá di un manifestashon masal, nos a haña muchu poko hende pa realmente manda un mensahe kla. Esei no ta nifiká sinembargo, ku no mester skucha opinion di esnan ku a manifestá den último dianan. Lo ta un akto di arogansia masha grandi pa dal bai, hasi komo si fuera no tin opservashon krítiko i malkontentu den nos komunidat.
*********
Si no ta pa elementunan supversivo i ku no tin rèspèt pa nan ko-suidadanonan, Lorito tambe lo tabata presente ayera. Lorito no por uni ku hende ònbeskòp, frustrá, mente chikí i ku kompleho di inferioridat. Ta bon pa Lorito bisa, ku pa loke ta trata struktura estatal, Lorito no ke nada (lesa bon: nada) ku tin di aber ku Sint Maarten. E úniko eksepshon ku nos kier hasi ta pa korte pasobra nos ta kere ku no por otro. Asuntu di un PG kompartí, un Banko Sentral kompartí, un moneda kompartí, un Polis kompartí, un Duana kompartí, un SVB kompartí, un APNA kompartí etc. etc. no ta haña nos apoyo. Ademas nos ta di e grupo ku ta kere ku Sint Maarten no tin derechi di haña un status outónomo den Reino (ainda). E isla simplemente no ta kla p’e!
*********
Kòrsou si ta kla infrastrukturalmente i tin sufisiente rekurso humano pa haña un status outónomo den Reino. E úniko problema ku nos tin, ta nos mentalidat di esun versus di e otro. Si bo tende un dirigente polítiko pretu papia malu ayera nochi di un intelektual pretu meskos kuné (diskulpa ku nos mester pon’é asina skèrpi), anto ya bo sa ku nos ta leu for di kas. E mesun dirigente ta boga pa independensia, pero ta ku ken e kier bai independensia anto si bo no tin rèspèt pa bo mes hendenan kalifiká?
*********
Nos no a komprondé tampoko kiko tabata e issue real ayera. Ta struktura estatal, ta hasimentu di sèks ku bestia, ta nombramentu na Dòk, ta hasimentu di sèks di homoseksualnan den Vondelpark, ta oumentu di kosto di bida, ta ....etc etc. etc? Splika nos kiko tabata i ta e issue!
*********
Hopi ta esnan ku a reklamá tambe ku e partidonan grandi a laga partidonan chikí sekuestrá e proseso. Ta parse nos ku un hende manera Charles Cooper mester tabata mas pronunsiá, siendo e di dos partido mas grandi di Kòrsou. Un hende a bisa nos, ku Charles no ta wòri mas: ya kaba el a haña 14 mil heldu pa luna na Isla i e ta kla! Nos no por kere ku esei ta e idea!
*********
By the way pa nos amigu ku a kue e issue di Vondelpark duru tene, awe komisario di polis na Amsterdam a bisa ku no ta bèrdat ku lo permití e kosnan aki tuma lugá den aire liber. Ban wak kiko e ta bisa awor. Por lesa e opinion di komisario Bernard Welten riba www.parool.nl
*********
Nos kier duna palabranan di felisitashon pa algun hóben ku ta demostrá ku por hinka positivismo den nos hóbennan. E grupo Montunero ta sobresalí den bailamentu i nan a impreshoná nos na WTC den “Bida ta un Baile”. Nos a keda masha enkantá. Un pabien na e grupo di hóben aki i nan lidernan ku ta dunando tur ku tin pa duna nos hóbennan no solamente konosementu di idioma, aritmétika i otro asignaturanan, pero tambe kreatividat di bida. Pabien! Nos ta keda te aki awe. Te mañan ku Dios su poder!