WILLEMSTAD - Niun di e partidonan di e Aliansa Patriótiko a saka un komunikado awe mainta pa duna nan opinion riba e manera ku kosnan a bai ayera. Den privá, algun di e dirigentenan a ekspresá desapunto, pasobra nan a kere ku lo a bin hopi mas tantu hende ku e kantidat grandi ku a asistí na Hòfi Biesheuvel resientemente. Algu mas ku mil hende a hasi akto di presensia ayera. Na momentu ku diferente dirigente a hiba palabra, ainda kosnan tabata masha kurú ainda. Kiko ta kousa di e kantidat ménos di hende ku a hasi akto di presensia no ta masha kla. Algun hende ta tira esei riba e hecho ku ta den siman i na un lugá muchu difísil pa alkansá. Algun otro hende a bisa, ku ounke nan ta kontra, nan no kier asosiá nan mes ku sierto gruponan ku krea bochincha manera Niun Paso Atras, PLKP i Pueblo Soberano. Un grupo a bisa ku e meta di ayera no tabata masha kla, komo ku e manifestashon a kuminsá komo algu kontra e proseso estatal i a bai kaba den un meskla di kos kaminda inkluso a hinka temanan manera sèks ku animal i sèks públiko na Ulanda den e temanan ku a bin dilanti. Algun dirigente a papia palabra insolente ku sigur a zona hopi duru den e transmishon na radio.
LA PRENSA mester bisa, ku di tur manera e manifestashon no ta algu ku outoridatnan na mando por ignorá. El a manda un señal kla ku tin sierto malkontentu riba diferente tema.
Un di e puntonan ku a disidí ayera ta pa bai bario awor ku e mensahe. Ta konosí, ku den pasado hopi ta e partidonan ku a anunsiá ku nan lo bai bario (manera e famoso Krusadanan Popular ku a kaba na aros i koko) i ku despues di tempu e interes a baha gradualmente.
Te na momentu ku LA PRENSA a bai imprenta awe, no tabatin niun komentario ofisial di Aliansa Patriótiko riba kon nan ta pèrsibí e manifestashon. Por sierto, ku gran ousente ayera tabata lider di Democrat Norbert George ku a preferá di bai hasi un biahe pa Ulanda serka VNG ku akudí na un manifestashon popular ku e mes a invitá p’e.

Score: 0.0, Votes: 0