WILLEMSTAD – E Asosashon di Doñonan di Pòmp di Gasolin (COPDA) no a haña invitashon pa partisipá den e komishon pa studia alternativanan pa e impakto di preis di produktonan petrolero riba nos komunidat. E desishon pa no invitá COPDA a kousa masha strañesa, no pasobra COPDA ta un protagonista importante riba e tereno aki pero tambe pasobra pa mas ku 10 aña COPDA ta un di e pokonan ku a bin ta mustra riba e nesesidat imperativo pa atendé e situashon di energia ku nos komunidat lo konfrontá. “Awor aki nos ta koriendo tras di e hechonan”, asina sekretario di COPDA Norman Perry a duna di konosé. Pa loke ta trata e desishon pa no invitá COPDA, Perry a bisa ku aparentemente ta konsiderá un tipo di “enfant terrible”.
“Nos opinionnan pa loke ta trata posibel alternativanan ta masha kla”, asina Perry a bisa. Perry a bisa ku mester hasi un estudio serio di un posibel afiliashon na e inisiativa venezolano Petro Caribe. Ademas tin e oferta pa pone kabelnan di koriente entre Venezuela i Kòrsou. “Posiblemente hende lo pensa ku esei no ta posibel pero teknologia ta avansando”, asina Perry a bisa. Perry a bisa tambe ku mester wak tur e komponentenan di struktura di preis di gasolin, disel i otro produktonan. Pa yega na esei mester haña e fakturanan mira ku CUROIL ta paga.
E sekretario di COPDA a bisa ku su organisashon lo no aseptá pa mishi ku e márgen di ganashi di doñonan di pòmp ku awor aki ta 12.35 sèn pa liter. “Ya ta 10 aña kaba ku no a ahustá e porsentahe aki i por bisa ku nos a kontribuí ku e situashon mas ku 10 aña kaba”, asina Perry a bisa.
Den e dekreto ku Gezaghebber i Sekretario di Teritorio Insular a firma pa lanta un komishon pa studia alternativanan, a anunsiá ku e komishon lo tin 3 siman pa presentá proposishonnan. LA PRENSA a haña kopia di e dekreto aki i enbèrdat no ta menshoná COPDA den e komishon.
Loke si a pasa ta ku a nombra un representante di VBC. VBC a tuma kontakto ku COPDA kaba pero COPDA ta konsiderá ku e tin su mes lugá den henter e diskushon i no por partisipá bou di kapa di un otro entidat komersial.
Banda di VBC tin tambe den e komishon e hefenan di Servisio di Asuntunan Ekonómiko, Dienst Arbeidszorg, Hefe di Finansa. Direktor di Curoil, Aqualectra i Refineria di Kòrsou, un representante di VBC, un di Kámara di Komersio i dos di Plataforma sindikal.
Presidente di e komishon ta un tal S. Theodora i e sekretario ta un tal M. Olaria-Maduro.