PHLIPSBURG/WILLEMSTAD – Inspektor di polis Alfred “Churchill” Marsdin a haña su libertat ayera nochi, despues ku a interog’é pa espasio di 10 ora relashoná ku alegashonnan ku e tabata enbolbí den iregularidatnan na momentu ku e tabata Hefe di Imigrashon na Aeropuerto Internashonal di Sint Maarten. Den un entrevista ku e korant The Daily Herald despues ku el a bandoná prizòn, e funshonario di polis a proklamá su inosensia i a insistí ku e tabata víktima di un intento kruel pa asesiná su karakter.
Kontrali na e kaso di Derrick Holiday ku outoridatnan a detené ku un despligue di forsa eksagerá, e biaha aki Ministerio Públiko a invitá Marsdin pa presentá na Ministerio Públiko. Despues di a hasié diferente pregunta a pasa pa su detenshon relashoná ku e sospecho ku el a falsifiká dokumentunan di imigrashon. A hib’é prizòn Point Blanche pa interogashon. E detenshon di Marsdin ta e di tres di un funshonario haltu di polis na Siunt Maarten den 9 luna i e di dos den un luna di tempu. Su detenshon tabata kombersashon di dia na Sint Maarten. Fiskal Taco Stein a bisa ku a prolongá detenshon di Marsdin i a haña aprobashon pa detené te mañan djabièrnè 3’or di atardi. Pero a lag’é bai ayera nochi 7’or. Famiananan i amigunan tabata pará na su kas na Walter Nisbeth Road ta ward’é.
Marsdin ku ta tambe un polítiko aktivo (number 10 riba lista di National Alliance den e último elekshon) a bisa ku nan kier tapa su boka, pero nan lo no logra hasi esei. Den un entrevista ku e korant Marsdin a bisa, ku e no tin nada di skonde i ku e no a hasi nada malu. “Mi ta 100 porshento sigur, ku mi no a hasi nada robes. Mi a traha di akuerdo ku proseduranan”, asina Mardsin a bisa. El a splika, ku nan a hasi’é un seri di pregunta riba iregularidatnan ku e lo a kometé na Imigrashon di aeropuerto. Algun di nan ta kosnan di basta aña kaba manera e hecho ku el a laga un hende ku no ta tin residensia drenta pa 100 dollar. El a bisa, ku e no ta korda e kaso aki, pero si el a laga e hende drenta lo tabatin bon motibu pa esei. Ademas nan a puntr’é tambe tokante di yudansa pa laga damanan di e stripclub Bada Bing drenta pais violando e protokòlnan eksistente. “Esei no ta bèrdat. Ademas si t’asina di kon nan no a tene mi será?”, asina el a puntra.
Segun Marsdin, den e kaso aki por papia di un yagmentu i el a menasá ku e ta bai basha abou riba e korupshon real ku tin den e sistema hudisial na Sint Maarten pa algun aña kaba. “Ministerio Públiko a tapa ladronisia di Marechausseenan ku tabata na Sint Maarten i mi por proba esei”, asina Marsdin a bisa. Finalmente el a bisa, ku e ta kere su detenshon tin di aber ku un proseso pa difamá ofisialnan di polis riba e isla. Despues di e entrevista Marsdin a sinta papia largu ku Holiday ku tabata detené i despues outoridatnan a laga bai. Aña pasá na yüni outoridatnan a detené Hefe di Imigrashon Marcel Loor relashoná ku froude na imigrashon. El a haña un kastigu di prizòn di 4 añja na novèmber i un but haltu pa aseptashon di soborno i maluso di su posishon.