PHILIPSBURG – Diputado di Asuntunan Konstitushonal di St. Maarten, Sarah Wescot-Williams tin speransa ku diskushonnan ku Sekretario di Estado di Ulanda pa Asuntunan Konstitushonal, Ank Bijleveld-Schouten riba e fecha di 15 di desèmber lo tuma lugá na aprel. E konsulta polítiko programa ku tur partner di Reino lo keda kanselá. “Durante mi diskushonnan ku Bijleveld na Ulanda, e tambe a ekspresá su dudanan ku lo bai tin un konsulta polítiko na aprel próksimo, esaki pasobra lo no tin asuntunan kla pa tuma desishon polítiko riba nan ku eksepshon di e fecha di 15 di desèmber,” asina e diputado di St. Maarten a deklará.
Wescot-Williams a bisa Bijleveld-Schouten, ku e si ta kere ku un diskushon mester wòrdu ten’é na aprel, ounke ku lo no tuma ningun desishon. “E informashon riba e posibilidat pa logra e fecha stipulá tei i mester keda diskutí.”
Di akuerdo ku diputado Wescot-Williams, e Sekretario di Estado di Ulanda a indiká, ku ta na fabor di un diskushon asina, pero no na un nivel di konsulta polítiko. “Ban spera ku na mei un konsulta polítiko por tuma lugá,” e diputado a sigui bisa.
Pa loke ta trata e negosiashonnan ku ta andando relashoná ku e proseso di kambio konstitushonal, el a bisa ku St. Maarten ta mantené e punto di salida ku desaroyo konstitushonal ta un pakete kompleto riba kual tur partner a yega na un akuerdo riba diferente área manera finansa, hustisia i bon gobernashon, ku bista riba e kambio di status pa e diferente entidatnan.
“Nos lo ta hopi preokupá si e asuntu di saneamentu di debe wòrdu separá i atendé su so for di e sobrá áreanan i sobrá asuntunan, mayoria otro di St. Maarten lo no ta nesesariamente interesá pa kompletá e proseso i logra materialisá e status nobo pa e entidatnan.”
“Nos tur a yega na akuerdonan riba diferente área komo parti di diferente konklushonnan durante añanan manera entre otro akuerdonan di 2 di novèmber 2006 i febrüari 2007. Nos ta kere ku tur asuntu mester keda atendé ku mesun urgensia i emergensia ku otro,” asina diputado di Asuntunan Konstitushonal di St. Maarten, Sarah Wescot-Williams a finalisá bisando.