(Nicaragua a yega ayera nochi)

WILLEMSTAD - Djadumingu pa 5’or di atardi e buelo di KLM K735 for di Amsterdam a baha ku miembronan di e selekshon nashonal di futbòl.
For di djadumingu a kuminsá tambe ku e último preparashonnan di e selekshon pa e gran partido di futbòl ku tur hende tabata spera mayan djarason.
Entretantu e promé entrenamentu di nos selekshon a tuma lugá den Stadion Ergilio Hato.
Nos selekshon nashonal definitivo, bou di direkshon di Leen Looyen, ta konsistí di e siguiente streanan:
Kipernan: Wencho Farrell i Raymond Homoet
Defensornan: Angelo Cijntje, Tyrone Loran, Angelo Martha, Eugene Martha, Lennox Mauris i Djuric Winklaar.
Medio kampistanan: Giovanni Franken, Anton Jongsma, Revy Rosalia, Orlando Smeekes i Angelo Zimmerman
Atakantenan: Dyron Daal, Brutil Hosé, Richal Leitoe, Benjamin Martha i Sendley Bito.
Mester apuntá ku Robin Nelisse lo no forma parti di e onsena ku ta subi tereno kontra Nicaragua debí na estado di su señora ku ta en esperá di e pareha su promé yu un di e dianan aki.
Entretantu djaluna anochi 7 or e selekshon di Nicaragua, bou di direkshon di Mauricio Cruz, e pone pia na Kòrsou i lo kuminsá awe djamars ku nan entrenamentu pa mañan djarason.
Aki na Kòrsou nos mester minimalmente empatá ku Nicaragua pa por sigui pa nos siguiente reto ku ta Haiti.
E selekshon ta konta ku e ta risibí apoyo i sosten di e públiko lokal p’asina por garantisá nos pase.
Karchinan ketu bai ta na benta na bentana di benta na Sentro Deportivo Kòrsou, Beep Beep Rio Canario i Brievengat i 4th of July na Barber.
Tur hende ta keda rekomendá pa pasa kumpra bo karchi mas lihé ku ta posibel pa bo ta den Stadion Ergilio Hato mañan anochi ora bala kuminsá lora 8’or en punto.
For di 6’or portanan di Stadion Ergilio Hato ta habri.
Kòrda ku na porta tin un vigilansia fuerte kaminda lo listra delaster un persona ku ta drenta Stadion Ergilio Hato.
Si bo yega trempan bo ta garantisá ku bo ta den stadion sinta kómodo promé ku e wega kuminsá.
NAVU lo perkurá pe entretenimentu miéntras ta warda e pitaso di e árbitro 8’ or pa bala kuminsá lora.


NAVU i su patrosinadònan mayó Fundashon Bon Intenshon, Ennia i Maduro & Curiel’s Bank ke invitá un i tur un biaha mas pa no pèrdè e oportunidat úniko aki pa ta parti di algu históriko kaminda nos ta dal un paso konkreto na kaminda pa mundial 2010 na Sur Afrika.