WILLEMSTAD – Tur hende ku ta kria kachónan pitbull mester registrá nan promé ku 2 di mei próksimo. E atvertensia akí ta bin, despues ku ayera tabatin un otro insidente, kaminda dos kachó pitbull a morde un hobensitu di 5 aña.
E insidente a tuma lugá ayera nochi tempran, despues ku un otro hobensitu di 5 aña a kaba di hunga na kas di e víktima ku ta su bisiña. Ora esun tabata bai su kas, e víktima a disidí ku e ta bai kuné. Na momentu ku nan a yega na e kas kaminda e kachónan ta, e kachónan a sali riba kaya i morde e hobensitu bisiña. Ku heridanan grave na su kara i lomba, a transport’é pa hòspital, kaminda e ta interná ku entre otro un ‘klaplong’. Su situashon ta serio, pero stabil.
Resientemente gobièrnu a anunsiá, ku e lei ku ta regulá krio di kachónan peligroso a drenta na vigor i ku tur doño di un kachó rasa pitbull mester registrá nan kachó promé ku 2 di mei próksimo. Sin embargo, dor ku e formularionan di registrashon no tabata kla, e registrashon a surgi retraso. E registrashon ta enserá, ku e kachó ta haña un chep implantá den su kueru. E chep ta kontené tur dato di e kachó i e doño. Na mes momentu ku registrá e kachó, mester sterilis’é tambe, pa asina poko poko kaba ku reprodukshon di e rasa. Mas aleu e doño di e kachó mester sòru pa e kachó ta na kadena i bistí ku un bosal ora ta sali kuné riba kaya. Na kas e kachó mester ta será den un kurá ku waya òf muraya haltu, di moda ku e no por sali riba kaya. Tur esakinan ta eksigensianan ku e doño di un pitbull mester kumpli kuné, segun e lei nobo ku a drenta na vigor resientemente.
Arnold Dwarkasing, ta e veterinario ku ta guia e proyekto di registro di kachónan pitbull. Den deklarashonnan ku Dwarkasing a hasi, el a splika ku pa loke ta trata e parti di e veterinarionan, nan ta kla pa registrá tur e kachónan. Sin embargo, e formularionan ku mester usa pa registrá e bestianan no ta kla. Debí na e situashon aki e proseso di registro ofisial, manera anunsiá pa Gezaghèber, a surgi retraso. E otro veterinarionan, segun Dwarkasing tambe ta mèldu ku nan klientenan ta presentá pa registrá i ta pone ku e dòkternan di bestia na nan turno ta hasi e pregunta, ta kon mester sigui atendé e asuntu aki. Por lo pronto di parti di e veterinarionan, ku mester tuma e datonan di e doñonan di e pitbullnan, ta duna e informashon nesesario na nan klientenan.
Tambe nan ta hasi e otro ehersisionan, ku ta entre otro chep e kachónan i hasi nan infértil. E ánimo bou di doñonan di kachó pitbull ta ‘redelijk’ segun Dwarkasing, ounke tin hende ku a bisa, ku nan no ta bai registrá nan pitbull, pasó nan ta kere ku no ta bai tin kòntròl tòg. E hendenan akí ta preferá di tene nan kachó fértil. Dwarkasing na su turno ta konsehá tur e hendenan akí pa registrá nan kachó, pasó si algu mester pasa, nan ta pèrdè nan kachó sigur. E mes lo trata na konvensé gobièrnu pa amplia e periodo di registrashon ku algun siman mas, ya ku ta ora e formularionan ta kla, e registrashon ofisial por tuma lugá.