ST. EUSTATIUS – St. Eustatius Business Association (STEBA) siman pasa a tene un foto relashoná ku reforma konstitushonal pa islanan BES, Boneiru, Saba i St. Eustatius. Pa e okashon aki tabatin vários orador prinsipal, diputado di Asuntunan Konstitushonal di e isla, Julian Woodley, direktor di STEBA, Koos Sneek, direktor Asosia di KPMG, Xavier Blackman, miembro di e Komishon di Supervishon Finansiero, Max Pandt i direktor general di OBNA, Clark Gomes Cassares.
Diputado Woodley a hasi un rekapitulashon di tur lokual a tuma lugá te ainda den e proseso, miéntras ku e direktor di STEBA, ta haña ku e informashon ainda no a yega serka e hòmber komun riba kaya i pa e sektor komersial.
Direktor Koos Sneek tambe a bisa, ku no solamente no tin ningun informashon disponibel, sektor komersial no a wòrdu enbolbí pa nada den e diskushonnan. “Sektor komersial no tabatin nada di bisa den e futuro struktura konstitushonal i sigur lo bai tin konsekuensianan grandi pa e manera ku nos ta kustumbrá di hasi negoshi. E ta spera ku gobièrnu tuma nota di e preokupashonnan ku a keda ekspresá den e foro aki i ku den futuro lo enbolbí e sektor komersial den henter e proseso di toma di desishon.
Sneek a pone atenshon tambe riba e rumornan ku islanan BES a skohe euro komo nan moneda den futuro. “Esaki ta leu for di e bèrdat. Te kaminda ami sa, ta hasiendo un estudio pa determiná tur e pro i kontranan di euro komo moneda pa islanan BES,” asina Sneek a añadí. “Tur hende ta na altura di e efektonan negativo ku euro tabatin komo moneda na St. Martin (parti franses). Mi ta antisipá, ku e resultado di e estudio aki lo demostrá, ku introdukshon di euro komo moneda pa islanan BES lo tin e mesun resultado. Mi opinion ta, ku nos mester studia seriamente e posibilidat pa keda ku florin antiano. E moneda aki huntu ku Banko Sentral di Antia ta un instituto ku a proba di ta fuerte i ku a sirbi nos bon.”
Xavier Blackman a bisa, ku e huntu ku Leonora Sneek a bin ku e nòmber BES en bes di K3. E ta kere, ku e futuro status konstitushonal ta un situashon di gana-gana pa tur e partidonan enbolbí.
Max Pandt a papia riba e sistema di impuesto den e status nobo i a hasi un apelashon pa tene esaki mas simpel ku ta posibel.
Finalmente, direktor di OBNA, Gomez Casseres a papia riba vários área ku ta inkluí desmantelashon di Gobièrnu Sentral, e futuro di SVB, APNA i Banko Sentral i e asuntu di debe. El a rekomendá un aserkamentu di un pa un. “E florin antiano mester keda e moneda di islanan BES pa 10 aña mas,” asina el a konkluí bisando.