LIMA – Claudio Pizarro a yama e suspenshon di 18 luna ku el a haña “un atropeyo” i el a ninga un biaha mas ku el a bebe i ku e tabata ku algun muhé den un konsentrashon di e ekipo di Perú. E desishon ta nifiká ku 18 luna largu e no por hunga pa selekshon di su pais. Pizarro, goliadó di Chelsea a haña suspenshon huntu ku Jefferson Farfán (PSV Eindhoven, Uanda), Santiago Acasiete (Almería, España) i Andrés Mendoza (Steaua Bucarest, Rumania).
“Mi ta sorprendí pa e sanshon ku a imponé riba mi i mi ta rechas’é. Mi no a kometé ningun indisiplina i mi ta inosente”, asina Pizarro a bisa den un entrevista na telefon ku e programa di televishon Kanal 4.
Pero José Mallqui, miembro di e Komishon Sudafrika 2010 di Federashon di Futbòl di Perú, a bisa ku e deklarashonnan di Pizarro ta ko’i hari. “Na momentu ku mi a skucha e deklarashonnan di Claudio Pizarro bisando ku e ta inosente, mi a pensa ku mi tabata skuchando un programa di chiste. Pizarro mester bira mas serio. Nos ta papiando di kosnan ku a pasa. E komishon ku a investigá e kaso a buska tur informashon promé nos duna un opinion”, asina Mallqui a bisa.
E komishon di hustisia di Federashon di Futbòl di Perú (FPF) a determiná ku e kuater miembronan di selekshon di e pais a partisipá den un benben ku alkohòl i hende muhé den pleno konsentrashon den un hotèl di Lima dia 18 di novèmber último. E motibu di e selebrashon tabata e empate di 1-1 kontra Brazil, pero dos dia despues e selekshon di Perú a pèrdè ku un skor hopi mahos kontra Ecuador na Quito. E investigadónan ta kere, ku ta e eksesonan ku a tuma lugá a pone e selekshon di e pais pèrdè.
Pizarro a bisa ku e federashon di futbòl di su pais a kometé un abuso i ku e sistema ta putrí. Pizarro a bisa ku den e anochi di e eksesonan el a bai su kamber 10.30, el a haña un masashi i despues el a bai drumi 11.30. No tabatin nada di selebrashon. Loke e federashon ta hasi ta un abuso, un atropeyo gañando hende”, asina e futbolista a bisa den su promé deklarashonnan riba e kaso aki.
E periodista Jaime Bayly a denunsiá e kuater hungadónan den e programa "El Francotirador" na desèmber último.
E sanshon kontra Pizarro, Farfán, Acasiete i Mendoza ta laga nan for di e eliminatorionan pa 8 fecha te dia 22 di mei 2009. Pizarro a bisa ku e no ta bai renunsiá selekshon di su pais. “Nunka mi a pensa di bandoná mi selekshon. E ta un di mi metanan, un di mi soñonan. Mi kier hunga un Mundial ku mi selekshon i mi ta bai lucha pa hasié”, asina el a bisa. Pero no tabata na un Mundial for di 1982.
Abogado di Pizarro a anunsiá kaba, ku lo apelá e desishon, si ta nesesario despues lo bai poder hudisial di Perú i eventualmente lo aserká FIFA tambe pa demostrá inosensia di su kliente.