WILLEMSTAD – Diputado Zita Leito (Struktura Estatal) a hasi e promesa ku lo ankra Teknologia di Informashon (ICT) den struktura di Pais Kòrsou.
E diputado a hasi e deklarashonnan despues ku a haña e dokumentu di diskushon “Plaats van de ICT in de organisatiestructuur van Pais Kòrsou” for di “Information & Communication Technology Platform” ku lo lanta próksimamente. Minister Adriaens a presentá e dokumentu na e diputado i tambe na minister enkargá ku ICT Roland Duncan.
E ICT Platform ku ta konsistí di Minister Adriaens i Diputado Rhuggenaath (representando Gobièrnunan) ta konta alabes ku representante di diferente gremio manera CICA, VBC, UNA, Stimul-IT, BTP, DEZ. Un di e metanan di e plataforma ta pa siguí establesé i desaroyá uzo di ICT den tur gremio di nos komunidat.
Durante e reunion ku Diputado Jesús-Leito, Minister Adriaens a ilustrá loke e plataforma a konstatá ku aktualmente den ámbos organisashon gubernamental e posishon di ICT ta kasi solamente riba e área operashonal. Esaki a trese kuné ku nunka ICT no a haña e posishon i konsekuentemente e chèns pa desaroyá manera esaki a tuma lugá den paisnan grandi manera Merka, Hulanda, pero tambe na paisnan den nos serkania manera Trinidad i Barbados. Segun Minister Adriaens mester evitá ku ta bolbe kometé e mesun eror hasí den pasado i ta enfoká ku ICT mester wòrdu butá riba e área di maneho. Esaki ta e úniko manera ku bo por saka balor agregá for di ICT manera otro paisnan si ta hasiendo aktualmente.
Diputado Jesus-Leito ku ta enkargá ku e proyekto di konstrukshon Pais Kòrsou a suprayá e konklushon di e ICT Platform. E “position paper” a yega na un bon momento mirando ku un “consultant” ta trahando riba e struktura nobo di organisashon gubernamental pa Pais Kòrsou. Diputado Jesus-Leito a partisipá ku sigur e lo tuma e konsehonan duná den e “position paper”. Sigur mirando ku ta diferente gremio representá den e plataforma ta para tras di e konsehonan aki. Finalmente Diputado Jesus-Leito a terminá bisando ku e lo sòru pa ankra ICT tantu riba e nivel di maneho i operashonal den e struktura nobo di Pais Kòrsou. A base di su eksperensia den sektor privá tambe e ta mira esaki komo e forma pa trese i establesé efisiensia den prosesonan di gobernashon pa nos Pais Kòrsou nobo en partikular i pa nos komunidat kompleto en general.
Minister Duncan, enkargá ku e direktorado di ICT na Gobièrnu Sentral, tambe a risibí e “position paper” pa medio di Minister Adriaens. Maske nos ta den proseso di desamantelashon di Antia, Minister Duncan tambe ta di opinion ku ICT mester tin un ròl mas prominente den e aparato públiko. Den bista di Minister Duncan esaki ta e momentu pa hasi esaki mirando ku e paisnan nobo ta “under construction” aktualmente.