WILLEMSTAD – Siendo ku Kòrsou (Antia) tabatin e delantero den nos área pa loke ta trata Internet, nos a bai a kai atras enormemente den último añanan. Diripente awor e konsenshi a lanta ku mester hasi algu purá pa kontraarestá e situashon.
Ekspertonan ku LA PRENSA a papia kuné ta bisa, ku na Kòrsou awor aki e máksimo di spit di Internet ku un hende por haña ta 2 megabit. Na otro paisnan ya kaba ta papia di 4 megabit i na preis barata. Na Ulanda ta papia di 10 megabit i den algun kaso hasta di 20 megabit. Ekspertonan a registrá te awor aki e velosidat mas haltu ku ta 40 megabit. E sifranan aki ta djis pa ilustrá kon atras nos a keda.
Pero ta parse ku ta bai bin kambio den e situashon aki. “Kalidat tin ku drecha i preis di internet tin ku baha”, asina minister Maurice Adriaens, un mandatario ku pensamentunan moderno i pionero ta bisa. Despues ku el a firma un akuerdo ku kompanianan di telekomunikashon pa yega na un sistema nobo di interkambio di Internet, e minister a biaha awe pa Miami, kaminda e lo tene un presentashon. “Nos ta sigui dal bai ku tur forsa”, asina e minister a bisa LA PRENSA promé ku su biahe.
Determiná pa drecha kalidat i baha preis di internet, minister Adriaens a invitá kompanianan di telekomunikashon na Antia pa un presentashon enkuanto Internet Exchange. T’asina ku durante su último biahe di trabou na Ulanda, minister Adriaens tabata di bishita na Amsterdam Internet Exchange (AIX), kaminda el a tuma nota di esaki i presentá su vishon enkuanto internet pa Antia. Resultado di e biaha aki tabata ku AIX a mustra mes ora nan disponibilidat pa yuda Antia lanta un Internet Exchange.
Mr. Witteman (direktor) i sra. Mascini (marketing manager) di AIX tabata na Kòrsou pa duna un presentashon tokante e bentahanan ku Internet Exchange ta trese kuné pa e kompania di telekomunikashon en partikular i pa Pais en general. Mirando nos potensial, e direktor di AIX a aksentuá ku: “Nos no mester konsentrá riba un Internet Exchange pa Antia so, pero unu pa Karibe”.
Mr. Adriaens riba 2 i 3 di aprel próksimo lo ta un “speaker” durante un konferensha internashonal di Internet Exchange na Miami. Aki tur e grandinan riba e tereno aki ta bini huntu pa interkambiá informashon i produkto nan. Mr. Adriaens lo bai elaborá riba e establesementu di un Internet Exchange na Antia i bende e servisionan ku pronto nos pais lo bai duna.
Miembronan di direktiva di UTS, Smitcoms (St. Maarten), TelBo (Bonaire), Digicel, Mio, Scarlet durante e presentashon a mustra nan interes i disponibilidat pa lanta e Internet Exchange. Kreando un Internet Exchange lo no yuda solamente pa drecha kalidat i baha preis di internet na Antia, pero meskos ku den temporada di Offshore Banking, e tipo di servisionan brindá via di internet exchange lo sòru pa krea kuponan di trabou, asina minister Adriaens a bisa finalmente.