WILLEMSTAD – Direktor di Turismo Evita Nita a atvertí, ku lo ta un eror kostoso pensa ku komo ku ya kaba turismo ta bayendo bon por baha fondonan di merkadeo. “Kòrsou mester sigui keda den mente di e turista i merkadeo ta e instrumento pa logra esei”, asina sra. Nita a bisa na radio relashoná ku e sifranan impreshonante ku Kòrsou a registrá pa loke ta trata febrüari 2008.
Sra. Nita a bisa ku en bèrdat kisas por surgi awor e pensamentu ku Kòrsou ya kaba ta eksitoso riba e tereno aki i por baha òf hasta stòp fondonan pa promoshon di turismo. Den seno di turismo tin preokupashon enorme pa e anunsio ku lo baha fondonan pa promoshon di turismo ku 7.5 mion florin e aña aki den kuadro di e esfuersonan pa balansa presupuesto di Gobièrnu di Kòrsou. Sra. Nita a bisa ku baha fondonan di promoshon ta un idea eróneo. “Kòrsou mester keda den mente di e turista i no mester laga e kos aki slèk”, asina el a bisa. El a ripití ku sektor di turismo ta mira e petishon pa baha gastunan di promoshon di turismo ku masha preokupashon. Mester tene kuenta, ku nos ta bai haña mas kamber di hotèl i esei lo rekerí pa nos sigui kòrda e turista ku Kòrsou ta un opshon atraktivo. Ta bin aserka ku promoshon na Oropa awor aki mester di mas fondo komo ku balor di euro ta subiendo mas i mas versus di florin antiano, asina sra. Nita a bisa.
Ayera Ofisina di Turismo a anunsiá ku Kòrsou a risibí bishita di 33.653 turista na luna di febrüari 2008, pues un total di kasi 12 mil turista mas a bishitá Kòrsou kompará ku 21.787 turista den e mesun luna na 2007, kual ta marka un subida di 54.5%. E kantidat di turista krusero tambe a subi ku 16% kompará ku e mesun temporada aña pasá. E kresementu rekòrt aki tambe ta debí na e kantidat grandi di turista Venezolano ku a bin ta bishita Kòrsou último lunanan. En total tabatin 11.201 venezolano di bishita na Kòrsou den luna di febrüari kompará ku 1.823 venezolano den luna di febrüari di 2007. Kontakto ku operatornan di Tour i agensianan di biahe na Venezuela a revelá ku e manera mas importante pa logra bentaha riba tèrmino largu di nan interes kresiente pa e isla di Kòrsou ta di mantené nos promesa di sigui brinda nos produkto turístiko di bon kalidat, servisio i amabilidat pa ku e turista venezolano. Venezolanonan a redeskubrí Kòrsou; reservashonnan delantá ta proba nos esei i tur kos ta mustra ku nos lo sigui mantené e kresementu den e siguiente lunanan.
E merkado europeo a krese ku 14.1% kompará ku febrüari 2007; merkadonan importante manera Ulanda a krese ku 11.4%. E merkado di Alemania a konosé un subida rekòrt di 73%; otro paisnan europeo tambe a sigui krese, manera entre otro Bèlgika (30%), Finlandia (24.2%) i Italia (71.1%). Otro merkadonan europeo manera Suesia (-21.1%) i Dinamarka (-9%) a baha kompará ku febrüari 2007.
Merkadonan di Sur Amérika importante manera Brazil (29.6%) i Colombia (63.7%) a sigui krese na luna di febrüari. Tambe ta hopi remarkabel e subida for di Perú ku 59.3% kompará ku febrüari 2007. E merkado di Sürnam si a konosé un bahada di 10.8% kompará ku e mesun luna aki na 2007.
E merkado di Karibe tambe a mustra un kresementu positivo den luna di febrüari, ku eksepshon di Haiti ku a baha ku 4.6% i Trinidad & Tobago ku 7.9%. Mayoria merkado a mustra un subida, manera entre otro Santo Domingo 16%, Jamaica 15.8% i Aruba 13.1%.
Tráfiko for di Estádos Unídos a subi ku 16% kompará ku febrüari 2007. En total tabatin 3.988 turista den 2007 kompará ku 4.625 den febrüari 2008. Na yanüari e aña aki 2.800 turista merikano a bishita Kòrsou, pues un subida konsiderabel. Ounke e merkado aki ta bou di preshon di e situashon ekonómiko difísil ku ta afektando biahe pa region di Karibe en general, nos ta basta satisfecho ku e desaroyo positivo den luna di febrüari, pero CTB lo sigui traha duru riba e merkado aki.
Un total di 38 barku krusero a bishitá Kòrsou ku 45.712 turista a bordo. Esaki ta un subida di 40.7% den e kantidat di barkunan krusero i un subida di 15.9% den e kantidat di turistanan krusero ku a bishitá Kòrsou na febrüari 2008 kompará ku febrüari 2007.
Gerensia di CTB ta hopi satisfecho ku e desaroyo positivo di e promé dos lunanan di 2008. Turismo di estadia a registrá un kresementu di 44% den e periodo ariba menshoná; turismo krusero a krese ku 6%; e averahe di okupashon di hotèlnan suministrá pa CHATA a alkansá un nivel di 92.7% den febrüari 2008 i 91.1% YTD. “Esakinan ta indiká ku Kòrsou su turismo ta den un desaroyando sumamente positivo. Nos di CTB ta enfatisá ku nos tur huntu mester sigui hasi lo máksimo pa brinda nos bishitantenan un eksperensia úniko i logra ku kada un ta bira un embahador di Kòrsou pa asina garantisá un turismo sólido i duradero”, asina sra. Nita a bisa.