WILLEMSTAD – Laura de Haseth Meddens i Wagner ku ta su kachó spesial di guia, ta bai konsientisá hóbennan na International School of Curaçao djamars dia 8 di aprel próksimo. Esaki komo parti di esfuersonan di e Fundashon Laura i Wagner (LWF) pa lanta konsiensia tokante di e papel di kachó di guia i di asistensia ku t’ei pa yuda hendenan ku desabilidat pa logra mas libertat di moveshon i independensia.
Laura, ku ta fundadó i vise presidente di e fundashon, huntu ku presidente Reyna Joe, lo konsientisá e hóbennan di e kampaña di LWF pa logra un lei di derechi di akseso igual. E lei aki mester pèrmití hendenan ku tin di hasi uso di un kachó di guia pa nan por bai ku nan kachó spesial, tur kaminda den Antia ku hende ku ta wak normal tambe por bai. Lo presentá e hóbennan un video riba historia di kachónan di guia i lo duna un demostrashon tambe di kon Wagner ta funshoná. Wagner ta un kachó di rasa ‘golden retriever’ ku a haña su entrenamentu na e organisashon ‘The Seeing Eye’ na Morristown, New Jersey na Merka. Wagner ta funshoná komo wowonan di Laura, kende a pèrdè su bista na edat di 28 aña.
Lo indiká e hóbennan tambe ku ora un hende tin un desabilidat, no ke men ku bo desaroyo personal a kaba ni ku bo por tin logronan personal.
Laura mes ta bisa ku: “Bo ta keda mesun hende ku bo tabata promé ku e desabilidat. I ku e fundashon nos ta hasi hende konsiente i pa logra haña rekurso, inkluyendo kachónan di guia, kual nan por yuda pa logra metanan, espesialmente pa esnan ku mester keda isolá den kas pa motibu di ekspektativanan di hendenan rondó di nan i e bèrgwensa ku kulturalmente nos tin pa ku desabilidat en general.
Banda di e konsientisashon di kon haña un kachó di guia, tin tambe e nesesidat pa traha na akseptashon di kachónan di guia den lugánan públiko den Antia. Segun Reyna Joe ku ta presidente di e Fundashon Laura i Wagner, nan ta konsiente ku tin hopi trabou di hasi den un komunidat manera di nos kaminda ku ta mira kachó komo protekshon di hende. “Mester laga hende komprondé pa nan por akseptá kachónan komo wowo di esun visualmente desabilitá òf di esun siegu”, segun Reyna Joe. Ta p’esei ta nesesario pa mas hende sostené e meta dor di firma e petishon pa yega na e lei ku ta atmití kachónan di guia den lugánan públiko. Por firma e petishon na www.LauraAndWagner.com i na www.LauraAndWagner.org. Intenshon ta pa duna mas tantu informashon posibel i ta p’esei tin chèns pa skolnan i otro organisashonnan pa nan tambe laga sa ku nan ke splikashon di LWF.
Un súplika ta bai pa empresanan i individuonan pa duna nan sosten finansiero na e esfuersonan aki, hasiendo un donashon na Laura And Wagner Foundation riba kuenta di banko nr. 20857603 na Maduro and Curiel's Bank, SWIFT: MCBKANCU.
Por haña mas informashon na Laura and Wagner Foundation, P.O.Box 8325, Kòrsou, e-mail info@LauraAndWagner.org, telefon (599-9)767-9255 òf (599-9)665-2785, fax (599-9)747-4142.
Riba e potrèt por mira Laura de Haseth Meddens i su kachó di guia Wagner.