WILLEMSTAD - Parlamentu antiano ta kuminsá su selebrashon di 70 aña di eksistensia awe nochi, huntu ku pueblo. Ta nos manera di selebrá 70 aña di demokrasia parlamentario, asina Pedro Atacho, aktual presidente di parlamentu a enfatisá.
LA PRENSA a informá for di algun siman anterior di e selebrashon aki, ku mester bira un kos grandi, segun dirigentenan polítiko mes a bisa.
Parlamentu di Antia ta kumpli 70 aña di eksistensia djasabra awor dia 5 di aprel. Pa selebrá esaki, un komishon presidí pa Getmar Caldera (FOL) a hinka un programa den otro ku un karakter solèm.
Pedro Atacho a splika ku komishon doméstiko di parlamentu a reuní algun tempu pasá riba e asuntu aki pa weta den ki forma ta bai atendé. A disidí den e komishon aki pa lanta un komishon spesial di parlamentu, ku lo keda enkargá ku preparashon di e selebrashon.
Durante un reunion di parlamentu a ratifiká e desishon pa lanta e komishon aki ku ta presidí pa ingeniero Getmar Caldera.
Den e komishon tin ademas e miembronan mr. Nelson Navarro, Dudley Lucia i tambe Eunice Eisden. Tur tabata presente ayera durante e konferensha di prensa kaminda a anunsiá e selebrashon ku ta kuminsá 7’or di anochi i ta kaba den kareda di 10’or di anochi.
E selebrashon lo bai kompañá ku algun aktividat, manera reunion solèm riba kada isla di Antia, un charla i tambe un resepshon, asina Getmar Caldera a splika.
El a anunsiá ku awe nochi 1 di aprel lo tin un selebrashon ku ta kuminsá ku un enkuentro eukuméniko 7’or di anochi. Lo tin despues un diskurso di dr. Rutsel Martha i despues tambe un diskurso di eks presidente di parlamentu Rufus McWilliam. Rutsel Martha lo papia riba kon engrandesé demokrasia miéntras ku Rufus McWilliam lo papia mas tantu riba su periodo komo parlamentario.
E anochi ta finalisá ku un enkuentro sosial kultural, kaminda parlamentarionan lo kompartí podio ku otro artista.
E aktividat di awe nochi lo ta den Alameda den Punda.
Dia 2 di aprel, den kuadro di 100 aña morto di Doktor, lo tin vários aktividat pa miembronan di parlamentu i eks miembronan di parlamentu, komo parti di oumento di demokrasia. Esaki lo ta na Banko Sentral di Antia.
E aktividat aki ta ser ouspisiá pa e grupo di 100 aña Doktor.
Dia 5 di aprel lo tin un reunion solèm di Staten kaminda a invitá tambe eks miembronan di Staten, Griffier di tantu Kòrsou, Aruba komo Sürnam.
Tambe lo invitá presidente di Parlatino i di COPA.
Dia 6 di aprel lo tin un akto solèm na Boneiru kaminda eks gezaghèber Richard Hart lo ta punto sentral. Aki tambe lo tin un servisio eukuméniko i un charla. Dia 9 i 10 d aprel e mesun kos ta sosodé na respektivamente Saba i Statia kaminda respektivamente Wil Johnson i Alida Frances lo hiba palabra, miéntras ku dia 11 di aprel esei lo tuma lugá na St. Maarten ku eks minister Leo Chance (Captain) ta figura sentral.
E intenshon ta tambe pa emití un buki konmemorativo pa e 70 aña di eksistensha di Staten. E último aktividat aki ta bou di kordinashon di aktual miembro di parlamentu mr. Glenn Camelia.
Den e buki aki, segun Dudley Lucia a splika ayera tardi lo tin kontribushon di grandinan manera profesor Douwe Boersma, di Rutsel Martha i tambe di Rufus McWilliam.