WILLEMSTAD – E diferente manifestashonnan ku a tuma lugá últimamente a kosta mas ku 200 mil florin. E plaka akí tabata pa kubri gastunan di Polis, S.K.S. i V.K.C. Debí na e gastunan akí no a sobra sèn pa polis por traha durante tur aktividat di siklismo ku mester tuma lugá e aña akí.
E dos manifestashonnan ku a tuma lugá na Marriott i e diferente medidanan di seguridat ku a tuma na Konseho Insular i Bestuurscollege, a kosta hopi plaka na ofertaim. Durante e manifestashonnan na Marriott, mester a hasi uso di efektivonan di S.K.S. i di V.K.C. pa por a reforsá polisnan. Espesialmente e gastunan pa por pone V.K.C. den akshon tabata haltu, debí ku nan ta un kuerpo boluntario ku sí ta risibí un gratifikashon.. Ta bin aserka, ku na WTC mester a usa espasio pa a ubiká e sentro di komando i tambe pa por a reuní ku tur e timnan ku mester a mantené òrdu públiko.
Debí ku e preparashonnan a kuminsá for di un dia anterior, mester a sòru pa kos di kome i bebe pa esnan ku a traha warda i ku a traha durante henter e dia. Finalmente mester a hür tambe material pa sera kaminda. Tur e kosnan akí a monta un kantidat di plaka. Na dos okashon mester a pone seguridat na tantu Bestuurscollege komo na Konseho Insular. Den e kasonan akí tabatin indikashon ku e manifestantenan lo a bai sea Bestuurscollege òf Konseho Insular pa protestá. Akinan tambe mester a hür material pa sera kaminda i sòru pa kos di kome i bebe pa e personal.

Kareda di baiskel

E gastunan envolví durante e manifestashonnan a pone un preshon enorme riba e presupuesto di Kuerpo Polisial. Konsekuentemente no a sobra sèn pa paga polis pa asistí na entre otro aktividatnan di siklismo. Anteriormente polis tabata dirigí tráfiko i eskoltá e siklistanan durante nan kompetensianan lokal. E asistensia akí lo no tuma lugá mas. E aktividatnan di siklismo internashonal si por konta riba asistensia di polis den futuro.