ATLANTA – E hóben picher yu di Kòrsou, Jair Jurrjens lo habri su promé wega pa Atlanta Braves.
Te ainda fanátikonan di Braves tin problema pa pronunsiá su nòmber.
Jurrjens si no tin problema pa bisa “Braves”.
“Djarason mi ta tira mi promé wega pa Braves”, asina el a bisa despues di a tira su último wega di eksibishon den fin di siman.
Jurrjens di 22 aña a lanta komo un gran fanátiko di Atlanta Braves na Kòrsou, pero esaki no pa motibu di Andruw Jones. Dia ku Jones a kuminsá hunga pa Braves, Jurrjens tabatin 11 aña, pero Jair su tata Carl ta un fanátiko di Braves for di dia ku e tabatin 10 aña, promé ku Braves bini Atlanta.
“Un amigu di mi a traha un bate i el a skirbi ariba Hank Aaron”, asina Carl ta bisa via telefon for di Kòrsou. “Asina mi a bira un fanátiko di Milwaukee Braves for di tempu ku mi tabata un mucha”.
Despues ku Jair a keda kambiá pa Braves òktober pasá Carl a bisa: ”Tabata un momento di hopi alegria p’ami. El a bisami, ku mi no mester bira un fanátiko di Detroit Tigers. Mi por keda un fanátiko di Braves”.
Carl Jurrjens lo no bai ta na Turner Field awe nochi. E ta bini mas lat den verano, pero e lo mira e wega na televishon na kas.
Jair a habri e wega di djabièrnè ei na Turner Field.
“Mi a krese mira e parke aki na televishon i awor mi ta picha den dje. Mi ta kere ku lo mi bai disfrutá picha aki”, asina Jair a bisa.
“E ta “spot’ su fastball, e tin un gran change-up”, asina e kècher Brian McCann a bisa. “E sa kiko e ta hasi riba montíkulo. E ta hopi madurá pa su edat. E tin un “four-seam fastball i un “two-seam” fastball i e ta pone e bala kaminda ku e kier. E ta bai bira un tremendo habridó”.
“Basá riba rapòrtnan ku nos tabatin i e tipo di hungadó ku nan a entregá den Edgar Renteria, nos a spera di por haña algun hungadó ku por yuda nos klup pa hopi tempu”, asina e gerente general di Braves Frank Wren a bisa. “I Jurrjens sigur a mustra ku e por hasi esaki”.
Mester bisa, ku esaki tabata e di dos chèns ku Braves por tin Jurrjens.
E ta bisa, ku na edat di 16 aña el a bini Orlando pa un “try out camp”, pero Braves no a firm’é.
“Nan a bisa ku mi tabata tira muchu poko poko p’ami edat”, asina e ta bisa. Tur kos ta sosodé pa un rason. Ta p’esei mi t’aki. Mi ta kere ku mi a demostrá nan ku mi ta pertenesé aki. Nan a dunami un chèns i nan a hasi un kambio p’ami”.