WILLEMSTAD – Delegashon di piskadó a sorprendé delegashon di Marina Real ku denunsia di “Kogelvergiftiging” durante nan reunion ayera. Manera ta konosí un delegashon di piskadó formá pa Sonny Hooi, Carlos Martinez i Erwin Koenze a bishitá Marina Real pa nan enkuentro pa dialogá riba e problemanan ku ta surgi pa motibu di entrenamentu di Marina Real. E reunion aki p’e diálogo a bai den un direkshon den kua piskadónan a pone nan kondishon pa stòp e entrenamentunan ku ta tuma lugá den área di Wacawa. E grupo di piskadó aki ta den representashon di piskadónan Boka Sami, Santa Martha i Westpunt.
Manera ta konosí djasabra último piskadónan den nan seno a deliberá promé ku e reunion ku a tuma lugá ayera pa fiha nan posishon di manera ku lo presentá nan pensamentu dilanti di e kuerpo di Marina Real ku tabata presente. E kuerpo di Marina Real a keda formá pa Hans Schreuder, direktor interino di Warda Kosta i tambe Roderick Gouverneur, relashonista públiko di Warda Kosta. E komandante Peter Lesenlink no por tabata presente debí na ehersisionan ku ta tumando lugá na Sürnam i ku e mester tabata presente pa esakinan. Durante di e diskushonnan riba e problema agudo delikado i serio aki, por a komprendé ku nan tabatin nan reunion promé ku e komandante a sali pa eksterior. Esaki a duna su punto di bista pa bin mesa di diálogo, di kua e piskadónan a rechasá kategórikamente. Den e enkuentro aki naturalmente e tópiko kayente tabata presentashon di e problema relashoná ku tiramentu durante entrenamentu militar fuerte di tera pa laman.
Den kòmbersashon ku Erwin Koenze, bosero di grupo di piskadó, a splika LA PRENSA ku a konstatá den e kòmbersashon di ayera ku entrenamentunan anteriormente tabata ku frekuensianan hopi abou, pero últimamente e frekuensia a subi. Pa motibu di e subida aki ta imposibilitá e piskadónan pa durante siman- òf lunanan no por ehersé e tarea di piska profeshonalmente pa por atkirí e mantenshon sosial di nan famia. Ademas esaki tambe lógikamente nan no por bende piská riba e merkado lokal. Segun Koenze ta mas ku klaro ku e eksigensianan di e piskadónan a bin dilanti pa stòp ku e tiramentunan di parti di Marina Real.
E delegashon representashon di Marina Real a mustra ku no por stòp ku e entrenamentunan aki i a indiká ku nan lo baha e ehersisionan den porsentahe. Inkluso esaki piskadónan a rechasá kategórikamente i ta insistí ku mester stòp ku entrenamentu ku tiroteonan di tera pa laman. Marina Real no por a garantisá ku den 1 luna seguridat, ya ku nan lo mester bai traha barikadanan pa evitá peliger.
Otro punto ku a bin dilanti den e diálogo ta ku e piskadónan a bisa ku e práktika militar aki ta konsiderá komo un robo di nan pan i ku ta hasi ku hende por kai den desgrasia sosial. Koenze ta afirmá ku e entrenamentu ta tumando lugá den e tereno di trabou di piskadónan i ku a duna rekomendashon pa Marina Real bandoná Wacawa i bai buska posibilidat pa entrenamentu na St. Joris.
E punto sorpresivo tabata na momentu ku a mustra nan un munishon ku tabata den barika di un piská ku a keda piská algun dianan atras. Ku esaki e delegashon di piskadónan a mustra ku esaki ta un práktika peligroso ku por wòrdu konsiderá komo “Kogel vergiftiging”. A tuma e munishon aki pa mas investigashon i 15 di mei próksimo den enkuentro entre piskadónan i Marina Real lo por tin mas klaridat riba e problema na Wacawa.