Skina di Sorti, awe djarason 2 di aprel di 2008, ta kuminsá ku deseá tur hende un bon dia. Miembronan di Tweede Kamer i gobernantenan ulandes, entre kual sekretario di Estado enkargá ku Asuntunan Antiano, drs. Anke Bijleveld, aparentemente ta siegu pa asuntu ku ta prioridat real di e respektivo komunidatnan antiano. Prizònnan, seramentu di refineria i e dòlfeinnan ku ta atraé turista pa Kòrsou, ta puntonan di prioridat di “de politiek” ulandes, pero no ta ni remotamente lokual tin nivel di bida di gran parti di komunidat, na e nivel di mediokresidat ku e ta.
****
Ta bèrdat ku segun kriterionan oropeo (òf mihó bisa ulandes) nivel di bida denter di prizònnan antiano ta laga di deseá. Pero prezunan, den nos pais no ta entre esnan mas vulnerabel. Nan ta kome kuminda di kalidat, na ora, i sufisiente, miéntras tin muchanan inosente ku no ta kome ni sufisiente, ni na ora i tampoko sufisiente. Tin sifranan ku ta mes òf te hasta mas lihé asesibel pa “de politiek” ulandes ku lokual nan ta akshoná riba dje pa asuntunan den i rondó di prizòn.
****
Embaraso hubenil, entre kual di muchanan ku ta bai skol i muchanan menor di 13 aña, segun notanan di atvertensia di instansianan konserní ta oumentando den forma aselerá. Malesanan venériko bou di hóbennan, apesar di e programanan di atvertensia i konsientisashon, a bolbe kue direkshon di kresementu aselerá.
****
Partisipashon di hóbennan den trafikashon di droga i adikshon na droga i alkohòl tambe ta ku tin instansianan konserní basta preokupá. Presidente di Sitek, Bicho Justiana na diferente okashon, riba diferente foro a bini ta ekspresá su preokupashon pa e violensia grave ku a drenta plenchi i klas di skol.
****
Si di un banda e efekto di hubentut antiano molestioso ta motivá “de politiek” ulandes pa bini ku sierto medidanan, tin tambe e otro banda di e medaya ku ta un kompetensia inhustu ku Ulanda ta representá pa e núkleo intelektual i profeshonal antiano. Ta un kestion di “de lusten wel, maar de lasten niet”.
****
Pa buena marcha mi ke pone bon kla, ku mi no ta bisa ku mester sera wowo pa e molèsternan ku nos hendenan ta kousa, ni tampoko ta bisa ku e problemanan di nos no ta asuntunan ku nos tin di asumí responsabilidat pe. Pero na momentu ku “de politiek” ulandes mes habri e porta di responsabilidat di Reino pa algun asuntu riba e respektivo islanan, e akshonamentu mester ta konsistente.
****
E reglanan di bon gobernashon ku mi a bini ta mustra riba dje, no ta konta únikamente pa nos gobernantenan. Nan ta konta ku mas forsa pa esnan ku ta asumí postura di modelo di bon gobernashon. Esun ku ta prediká bon gobernashon i ta husga otronan pa lokual nan ta konsiderá aktonan di mal gobernashon ta obligá di duna e bon ehèmpel. Ta for di esei bo ta derivá outoridat moral.
****
Ta un realidat ku e aserkamentu gubernamental ulandes, pa lokual ta nan pais Ulanda, ta riba un nivel hopi haltu. Sin mas por bisa ku “bestuurlijk” e ulandesnan por dikta kátedra. Pero ora ta trata di outoridat moral, e midimentu ku diferente midi i spesialmente e peso ku plaka ta hunga den e totalidat ta motibu ku diferente pais tin masha hopi problema ku e aserkamentu ulandes.
****
Amor tin di bini di ámbos banda i mester konstatá ku te ainda e ulandesnan ta mira otronan (antianonan no ta un eksepshon) komo “noodzakelijk kwaad” i den kaso di antianonan komo “onvermijdelijk kwaad”. Kaminda mester papia di miembro di Tweede Kamer ku ta sali na defensa di antianonan, esei ta nada mas ku konfirmashon ku ta nan i nos i ni sikiera nan i nos te pa por papia di pueblo di Reino. E realidat aki, mester subi mesa i mester wòrdu atendé den debatenan riba tur foro posibel.
****
Miéntras ta keda hunga fini i hasi komo si fuera tur kos ta “koek en ei”, no ta yega na un mehoramentu real di e relashonnan den Reino. No por keda hasi komo si fuera ekspreshonnan di un Hero Brinkman, miembro di frakshon di PVV den Tweede Kamer, ta insidentenan aisla. Ta manifestashon di pensamentu i sentimentu ku ta biba bou di kueru i serka vários te hasta un kos ku no ta wòrdu kamuflá.
****
Meskos ku “de politiek” ulandes tin di stòp di apliká diferente midí i ser siegu pa lokual no ta sirbi nan interes, “de politiek” antiano mester kuminsá asumí responsabilidat pa konsekuensia di nan eskoho. Solidifiká e relashon estatal ku Ulanda ta nifiká ku kosnan manera matrimonio entre hende di e mesun sekso, ta enserá un realidat ku nos lo tin di siña biba kuné.
****
E “koehandel” ku ta hasiendo ku e ulandesnan den e proseso estatal, ta hasi e kousa mas daño ku bon. E relashonnan lo no mehorá, pasobra no a mishi ku esensia di e problemanan. Pa no laga ningun espasio pa duda, mi ke pone bon kla ku oposishon no tin outoridat moral pa kuestioná esnan den koalishon riba e aspektonan real aki di e frakaso dje proseso estatal.
****
Oposishon na ningun momentu a plantia e puntonan aki komo aspektonan ku mester wòrdu agendá, te pa nan a formulá un posishon riba nan. Oposishon no a bai mas leu ku tumamentu di posishon ku mira riba bentaha elektoral. Ningun momentu tabata tin un intento di unifikashon pa atendé ku e défisit demokrátiko.
****
No tin nada malu den un aserkamentu ku ophetivo elektoral. Ta den polítika e respektivo organisashonnan polítiko ta. Pero na momentu ku no ta trata un asuntu di rivalidat polítiko, pero di realisashon di pasonan den un proseso emansipatorio di un pueblo, e “belevenis” ku tin di kompañá un meta asina noble, ta manda rivalidat polítiko na un di dos plano.
****
No por drai e oloshi bèk. Nos ta kaminda nos a yega i e diferente akuerdonan ta nifiká un desviashon for di e meta. Pero pa retorná den e bon direkshon i hasi avansenan signifikativo, mester kuminsá di aseptá e realidat di un fayo kolektivo. Di tantu “de politiek” antiano komo esun ulandes.
****
Artíkulo 43 di Statüt, ta papia di responsabilidat primario di nos, pero tambe di “waarborging” di parti di e ulandesnan. Ámbos a faya garafalmente den nan respektivo tarea. Tin diverso polítiko na nivel sentral i insular ku a tochi algun dje temanan ku mi a trese awe, pero ningun a hasié for di un posishonamentu koherente i konsistente.
****
Entre tantu e lider polítiko di PVV, Geert Wilders a drenta un “reverse” formal ku su sine. E produkshon riba su mes kaba a defroudá su siguidónan, pero awor e ta kòrtando formal tambe den dje, pa miedu di eventual reperkushon legal. Hopi skuma poko chukulati!!!!
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te otro mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.