Lorito ta yama tur hende un felis djarason. Basta hende a kai den e trampa di 1 di aprel. Tabatin diferente informashon ku ta pone hende pensa kon tin hende por kere sierto kosnan. Esun di Extra pa loke ta trata e kaha di morto na kandela tabata bon pensá i masha hende a koment’é. Hasta den eksterior nan a papia riba e kaso aki i ya kaba tabatin hende a reservá pasashi pa bin wak e fenómeno.
****
Un otro chiste ku a hala atenshon tabata e retiro di Jean Fransisca for di NAVU pa diferensia di opinion den futbòl. Ta ken por kere ku Jean lo laga un puesto asina atraktivo bai? Tabatin esun di detenshon di e reportero A.M. ku nos a ripará mesora ku no por ta pasobra A.M. ta hende serio. Esun mas serio tabata ku Sint Maarten a pidi Merka pa e bira estado asosiá. Un korant kolega a poné riba promé página! Na Ulanda Antillenhuis a kue e informashon mand’é pa tur hende sin buska drechi ku ta un chiste di promé di aprel.
****
Por sierto ku Antillenhuis tabata ariba abou awe mainta na momentu ku a parse manera kos ku tabatin asbèst den un di e edifisionan. Mester a desalohá un parti i manda diferente hende kas pasobra e otro edifisio (Antillenhuis tin dos edifisio) no por a akapará tur hende. Despues di un tèst a determiná ku tabata un alarma falsu. Mañan tur hende lo bin traha bèk.
****
Pluvius mes a disidí ku tin un kos ku no ta bon ku e selebrashon di 70 aña di Staten na Alameda. E mes a disidí di tuma medida. Awa a basha bin abou. Pluvius lo a pensa ku un kos di pueblo i pa pueblo na flus ta un poko raro. Ademas Pluvius a spanta di tur e kosnan ku el a tende, sigur ora un hende duna kátedra i e mes no a duna e mihó ehèmpel. Doktor a pidi pa tur hende bai studia pero a pidi tur hende tambe pa bin yuda nan pais! Algun hende a hasié den forma kontrali: nan a bai studia i bai traha pa otro hende. Otronan a bin traha aki pa nan mes interes i den algun kaso hasta a hinka sèn den nan mes saku! Hesus Doktor lo ta bòltu den su graf!
****
Despues ku Ank a papia i posponé tur kos lenganan a lòs ta kon esei ta posibel. Awor aki a bin ta pretendé ku kos por sigui tòg, aparentemente pa no pèrdè kara ku Ulanda ya kaba a tuma un posishon konkreto. Aki por bisa kiko ku ta pero sin koperashon di Ulanda nada no ta bai pasa. Lorito ta kere firmemente ku ta Sint Maarten ta e problema. Ulanda sa ku e isla lo no ta kla (i lo no ta kla por lo pronto) pero no tin kurashi di bisa e isla di Sarah. Ken ta e víktima un biaha mas?......Korekto: Kòrsou!
****
Lorito ta sinti ku nos gobernantenan i nos konseheronan a keda hopi laf. E kos ku bo por a spera por lo ménos den e kaso aki tabata un anunsio konhunto na Ulanda i Antia. Awor Den Haag a papia i Willemstad a keda bon laf (atrobe). Nos ta kere ku un reprimande pa Madame Ank ta na su lugá pasobra e no a hunga e wega aki ku e rèspèt nesesario.
****
Anto Ank ta lubidá un otro kos mas: ku su aktitut el a duna oposishon mas forsa kontra Gobièrnu i koalishon. Nèt loke e no tabata ke el a logra. Nos a lesa un kolumnista ku a bisa awe ku por ta, ta esei ta e strategia: sigui krea divishon aki miéntras Ulanda ta sigui ku su otro kosnan di tur dia normalmente miéntras nos ta kou otro aki!
****
Ademas Ank mester tabata sa ku aki ta tratando di yega na un proseso pa trese partidonan huntu. Su “knuppel” den NOS “hoederhok” a stroba tur kos atrobe. Deliberadamente? Ken ta para e kosnan aki i mustra nan ku nos ta eksigí rèspèt! Nos no ta mira niun hende ku por hasi esei awor aki, ni esnan ku boka grandi! Wil de “Antilliaanse Wilders opstaan?”
****
Nos kier a manda un saludo pa Leo Chance ku nos a papia largu ku ne awe mainta i ku ta “still groing strong”. Tempu di Leo Chance e kosnan ku ta pasa awe no por a pasa nunka. Nos ta mira bèk ku nostalgia riba e tempu ei! Ta di aseptá numa ku tempu i nos mentalidat a kambia! Te mañan ku Dios su poder!