WILLEMSTAD – Eks minister i eks parlamentario Marco de Castro, a pidi presidente di Staten Pedro Atacho atenshon pa e tenshon kresiente den nos área. E eks dirigente ta bisa, ku no mester pèrmití pa usa suela di Antia pa ataká otro paisnan. E ta referí na publikashonnan na Venezuela den sentido ku usa avionnan di Merka stashoná na Kòrsou (na e base FOL) pa lokalisá i bombardiá e movementu gueriero FARC na Ecuador.
Den un karta pa presidente di Staten, De Castro ta bisa, ku últimamente tin un tenshon kresiente spesífikamente entre e maneho di presidente Chávez di nos pais bisiña, esun di Colombia i esun di presidente Bush di Merka. “E último konfrontashon tabata na frontera di Ecuador, kaminda Colombia, e gran aliado di Merka a bombardiá algun rebelde riba teritorio di nan bisiña, sin pèrmit di e presidente di Ecuador, un gran aliado di presidente Chávez i otro paisnan bisiña di Colombia. Nos tur sa kuantu tenshon e kos aki a kousa den nos region te dia a yega na un bon final na Sto. Domingo. Sinembargo ainda tenshonnan no a kaba. Segun prensa awor ta resultá ku Colombia lo a rekonosé ku e bombardeo a tuma lugá, ku apoyo formal di Merka i su avionnan sofistiká. Loke awor tin Ecuador i Venezuela masha preokupá i loke mester ta un gran preokupashon pa nos tambe, awor ku presidente Chávez ta sospechá ku ta avionnan merikano stashoná na e F.O.L. na Kòrsou lo a ser usá pa lokalisá i bombardiá e miembronan di FARC riba tereno di Ecuador. Esaki ta hinka nos pueblo den un skina ku nos ningun no a deseá nunka. Kòrsou i Venezuela tin un historia masha largu di amistat, familiar, komersial i hasta di refugio pa venezolanonan. Ku Merka tambe nos tin un historia largu di masha bon relashon, komersial i di amistat, etc.”, asina De Castro ta bisa.
Mas aleu e ta sugerí pa Parlamento yama un reunion urgente pa haña informashon di Gobièrnu, pa despues di un bon debate, formulá i ekspresá punto di bista di Parlamento i Gobièrnu(nan) di nos isla(nan) den kaso di un konflikto den nos region i e posibel ròl, den práktika, di e FOL merikanu riba nos isla. I despues informá Ulanda di e desishon aki, promé ku nan disidí pa nos, sin nos! Segun nan interpretashon, den kaso di un krísis ta nan i nan so ta responsabel pa nos relashonnan eksterior i di defensa di “Nos reino,” manera mas i mas nos ta tende últimamente. Lo no strañami si interes di nos islanan no ta igual n’esun ulandes ni di esun di e FOL Merikano riba nos isla. Na mi opinion, un ekspreshon ofisial di nos Parlamento, na nòmber di nos pueblo ta hopi urgente i mi ke sugerí pa por lo ménos e dos puntonan siguiente ta forma parti di e deklarashon aki promé ku ta lat.
1. Ku nos no ke ta envolví den ningun, pero ningun konflikto ku nos bisiñanan ni ku nos amigunan. Nos insistensia pa respetá nos neutralidat den nos region mester ta kla pa tur hende.
2. Nos no kier tampoko pa ningun pais usa nos isla(nan) pa di ningun forma agredí òf yuda agredí otro pais den nos region.
Nos pueblo ta biba den un periodo di gran nerviosismo en bista di e eksperiensia desagradabel den nos region ku a resultá hopi biaha den invashon òf atakenan, totalmente indeseá, dor di e pueblonan mes. Interes di otronan a prevalesé regularmente”, asina e karta di De Castro ta bisa.