Sarah Wescot-Williams (Sint Maarten):

WILLEMSTAD – Lider di DP-Sint Maarten ku ta alabes diputado di Struktura Estatal Sarah Wescot-Williams, a lamentá ku no a sigui e palabrashon ku promé ku tuma un desishon riba eventual posponementu di e fecha di 15 di desèmber pa desmantelashon di Antia, a diskutí e asuntu aki polítikamente promé. Meskos ku na Kòrsou, na Sint Maarten tambe e karta ku sekretario di Estado Ank Bijleveld a kousa un sorpresa kompleto.
Un di esnan sorprendé ta sra. Wescot-Williams ku por sierto tabata na Kòrsou ayera i awe. Ayera el a papia ku promé minister Emily de Jongh-Elhage i diputado Zita Leito, miéntras ku awe el a keda di papia ku sra. Bijleveld ku ta hasiendo un bishita informal na Kòrsou.
E dirigente polítiko a bisa, ku tabata konosí ku e ekspertonan tékniko ulandes a bisa, ku nan no ta kere ku e fecha di 15 di desèmber ta alkansabel. “Pero a palabrá, ku lo hasi un planifikashon realístiko i ahustá, pero nos no a haña un chèns pa hasi esei”, asina sra. Wescot-Williams a bisa. Di tur manera, mester papia riba un fecha pa realisashon di desmantelashon di Antia, segun e diputado.
Pa loke ta trata e diskushon riba puntonan ku a bin dilanti ku ta kondishonnan fuerte pa e isla haña su status Outónomo den Reino, sra. Wescot-Williams a bisa, ku por atendé e puntonan aki despues di e fecha di 15 di desèmber. Ku otro palabra, e no ta kere ku mester a hala e fecha, pasobra lo no keda kla ku tur kos. Loke mester a pasa ta, ku mester krea un mekanismo pa asuntunan ku no keda kla. Den e situashon nobo ku lo surgi despues di 15 di desèmber, e ora ei e mekanismo aki lo mester a sigui atendé e puntonan pendiente, asina sra. Wescot-Willliams a bisa. Su ponensianan ta parse sinembargo di a bin un poko lat, komo ku ya e fecha di 15 di desèmber no ta parse masha relevante mas.
Por sierto ku tabatin basta komentario riba un publikashon di e korant The Daily Herald ayera ku a informá ku Sint Maarten lo buska un tipo di estado asosiá ku Merka. E informashon a resultá un chiste di promé di aprel. Diferente instansia, persona i hasta medio a kai den e trampa aki ayera.