Pronto lo hiba kòmbersashon ku Komishon Oropeo

WILLEMSTAD - Antia Ulandes pronto lo manda un delegashon Oropa pa papia ku representantenan di Komishon Oropeo. Ta trata aki kòmbersashonnan ku e Direktorado General di Belasting di Komishon Oropeo tokante di e hecho ku nos pais ta aparesé riba lista pretu fiskal di algun pais di Union Oropeo.
E kombersashon ku Komishon Oropeo ta resultado di un petishon ku Sekretario di Estado di Finansa, sr. Alex Rosaria, a hasi algu mas ku un aña pasá na e Ministerio di Finansa Ulandes.
“Loke ku Antia lo hasi ta kombensé Komishon Oropeo ku nos régimen fiskal debidamente ta kuadra ku reglanan internashonal i Oropeo. Una bes nos logra esaki, Antia lo pidi i ferwagt ku Komishon Oropeo lo hasi tur ku ta na su alkanse pa eliminá nos pais for di e listanan negativo aki”, segun sr. Rosaria a splika.
E kitamentu di nos pais for di e listanan anteriormente menshoná ta un prioridat di e maneho ku Gobièrnu a bin ta hiba pa loke ta trata e sektor finansiero internashonal. Na vários okashon sr. Rosaria a trese dilanti su malkontentu ku e hecho ku no ta eksistí reglanan internashonal i transparente pa pone paisnan riba lista pretu. Den práktika esaki ta nifiká ku tur pais ta liber ta pone un otro pais riba su lista pretu.
Te leu ku Gobièrnu ta na altura, nos pais ta aparesé riba mas o ménos 14 lista pretu, inkluyendo e paisnan di Union Oropeo Polonia, Italia i Gresia.
Aña pasá Antia ku éksito a logra di keda kitá for di e lista pretu di Mexico. Pa loke ta trata esfuersonan pa keda eliminá for di lista pretu di Brazil, sekretario di Estado Rosaria, tin programá pa durante un bishita huntu ku CIFA na e pais suramerikano aki den aprel, papia ku outoridatnan brasileño di e tema aki.
Pa loke ta trata e kòmbersashonnan ku Komishon Oropeo, e preparashonnan ta tumando lugá aktualmente. E sita mes lo tuma lugá aki 2 pa 3 luna.