ORANJESTAD- Huez Roovers awe mainta a manda su decision den e caso sumario cu Gobierno a entabla contra sindicatonan den accion, pa tur partido envolvi.
Resaltante di e decision di Corte, ta e hecho cu ta Sali for di e punto di bista cu mester salvaguardia e derecho sagrado di un comunidad, pa su seguridad no ta wordo neglisha.
Tambe e hecho cu Corte a determina cu accion di sindicatonan tin cu wordo anticipa, ta laga algun pregunta serio atras, ya cu e decision aki ta anula gran parti di e presion cu e sindicatonan kier pone riba Gobierno, pa yega na un solucion.
Mas serio ainda ta e hecho cu Corte awor a traha un “schema” con sindicatonan por bai den accion, cuanto dia si y cuanto dia no, influenciando asina henter e accionnan sindical.
E decision tambe ta un tiki controversial, ya cu mientras cu Corte kier pa cierto departamentonan no bai den accion pa motibo cu nan tin cu salvaguardia seguridad nacional, pero di otro banda esnan den accion, luchando pa nan derecho riba indexering, tambe ta esnan cu Corte ta pidi comprension y ta obliga nan di sigui eherce nan obligacion neglishando nan lucha pa indexering.
Esaki ta conta mesun cos pa e personal di Cuerpo di Bombero, personal di KIA, personal di Cuerpo Especial Arubano y di departamento di imigracion.
E decision di Corte ta prohibi e sindicatonan KPA, KIA, CEA y IASA, hunto cu Cuerpo di Bombero y di Douane, di bai den accion pa tempo indefini y si dado caso e sindicatonan tuma e decision di bai den accion, nan ta obliga pa avisa Gobierno di e plan aki 48 ora prome cu e accion tuma lugar.
Esaki no ta permisibel entre diabierna 5’or di atardi y dialuna 9’or di mainta, pues den e periodo aki e sindicatonan no tin mag di manda un aviso cu nan ta bai den welga.
Tambe Corte a impone un prohibicion pa personal di AAA bai den accion y si nan dicidi di haci esaki, nan tin cu avisa Gobierno cu nan ta bai den accion 24 ora prome cu e accion.
E tempo aki ta permiti Gobierno pa entabla un caso sumario contra di e accionnan aki, pues ta permiti Gobierno anula tur accion via di Corte di Prome Instancia di e sindicatonan.
PLAN DI ACCION
E punto mas interesante di e decision di Corte, ta caminda a determina un schema con e sindicatonan por bai den accion, esta cu si nan bai un dia den accion, esta di welga, nan tin cu asumi trabou pa tres dia sigui.
Despues nan por bai dos dia den accion y despues bolbe traha tres dia y siguientemente nan por bai tres dia den accion y sigui traha despues un periodo di cuater dia.
Realmente impresionante e decision di Corte aki, caminda por bisa cu Gobierno a logra na limita e accion di e sindicatonan, cu ayudo di Corte.
Hecho ta keda cu e sindicatonan por yama un reunion urgente na tur momento di dia, yamando tur nan miembronan pa bin atende e reunion, sin cu nan ta den accion.
Ta e sistema aki SPA a haci na varios occasion, caminda ta yama miembronan pa bin un reunion na nan cede di POVA na Barcadera, lagando solamente e oficialnan halto den servicio.
Tin tur indicacion cu esaki lo bai ta e caso tambe den proximo dianan, of a lo menos un di e posibilidadnan cu e sindicatonan a keda cune.
Mescos por sosode tambe, principalmente e fin di siman aki, cu trahadornan di AAA por wordo yama pa un reunion pafor di edificio na momentonan culminante, esta ora cu mas ta rekeri di nan servicio, y cual reunion tin base legal ya cu nan lo no ta den accion pero pa un ora of un ora y mei, e reunion aki por tuma lugar.
Pues un decision cu ta lanta un otro tipo di expectativa, caminda sindicatonan lo tin cu bai determina kico nan ta bai haci pa pone Gabinete Oduber razona riba henter e situacion cu tin.