Drs. Hans Blankert a elabora riba e exito di e sistema aki na Hulanda

ORANJESTAD- “Hopi satisfecho mes” esey tabata e prome impresion di Juan David Yrausquin, e Presidente electo di ATIA despues di e evento. E comerciante cu Dialuna anochi a keda re-eligi pa 1 aña mas den e puesto di Presidente di ATIA por mira atras na un reunion anual bon atendi y cu un presentacion exitoso cu a sigui su tras. “Cu e evento aki nos kier demostra na nos miembronan y na e comunidad di Aruba en general cu nos no ta papia solamente tocante e asercamiento cu mester tin entre gobierno, gremio comercial y gremio sindical pero nos ta haci algo pa logre tambe. Pesey nos a invita e ex-Presidente di e organisacion comercial di mas grandi na Hulanda, Presidente di Stichting van de Arbeid y Vice Presidente di Sociaal Economische Raad pa bin duna nos algun tips riba con nos por logra comunica cu otro y yega na acuerdonan comun na un forma mas eficiente”, asina Juan David Yrausquin a enfatisa.
ATIA a logra haya un cantidad di su miembronan cu for di 6’or di atardi a presenta pa e reunion di e asosacion di comercio di mas grandi di nos pais y a elabora riba aña 2007, a repasa nan cifranan anual y na mes momento a elabora riba nan plannan pa e aña aki. E miembronan den un forma unanime a accepta e cuentanan anual di aña pasa y a vota na fabor pa e mesun directiva sigui cu nan trabaonan pa dos aña mas.
Despues di e reunion interno cu a tuma lugar den Renaissance Convention Center, e miembronan a pasa pa un sala mas grandi pa asina topa cu invitadonan na e presentacion di Drs. Hans Blankert. Prome cu presentacion di e experto Hulandes riba e materia di “polder-model”, Juan David Yrausquin den su calidad di Presidente di ATIA a hiba palabra y a boga pa nos tambe na Aruba yega na un situacion similar na unda nos ta delibera cu otro na mesa y no cu nos mester haci di tur cos un discusion of problema.
SPLICACION
Drs. Hans Blankert a duna un splicacion extenso pero masha practico riba e forma di traha aki. Nan a dune e nomber di “polder model” pasobra manera ta conoci, un parti substancial di Hulanda ta bao di awa. Dor di construccion di “dijken” tur rond di e pais, a logra traha algun bario nobo manteniendo e awa pafor. Pero tempo a siña e Hulandesnan cu si nan no cuida e “dijken” nan cu despues di tempo nan ta daña, kibra y causa un desaster natural den e pais.
Ta despues di e mal experiencia aki cu Gobierno di Hulanda y e campesinonan a sera un compromiso cu nan lo traha hunto riba e materia. Cu Gobierno ta percura pa construccion di e “dijken” pero cu hunto cu e campesinonan lo percura pa nan mantencion constante. Di e forma aki Gobierno y e campesinonan por biba trankil sin cu nan ta bao di un menasa constante di awa. E formula aki a haya e nomber di “polder model” y despues di tempo a keda adopta pa otro paisnan cu gran exito tambe.
Aki na Aruba un Huez a duna nos sistema di negocia y atende cu otro como e “cunuco-model” pasobra nos relacion ta cu hopi mata cu sumpiña den dje. Nos kier ataca otro constantemente, papia malo di otro den forma publico y despues nos ta puntra nos mes dicon nos no por logra acuerdonan na mesa cu otro. Si henter e forma di negocia, henter e forma di yega na acuerdonan tabata diferente, anto nos lo logra mucho mas den nos comunidad.
Na final varios di e presentenan, entre nan dos Minister y varios Parlamentario for di mayoria fraccion den Parlamento, directornan di departamento, ex-Gobernador di Aruba, comerciantenan miembro di ATIA y invitadonan a haci pregunta na Drs. Hans Blankert kende a re-afirma cu e “polder-model” sigur lo por traha pa Aruba. E la admiti cu na Hulanda e proceso a tuma su añanan, pero cu si nos no cuminsa nos lo no alcansa e meta final tampoco.
E presentenan tur a keda masha contento y satisfecho cu e presentacion di e “polder-model” na comercio di Aruba y tur hende a expresa di lo kier mira un situacion similar presenta su mes na Aruba dentro di masha poco. Politiconan cu tabata presente tur a menciona di lo haci nan maximo esfuerso pa alcansa e meta aki, pero cu e proceso lo rekeri participacion di tur gremio den nos comunidad.
Despues di e presentacion di Drs. Hans Blankert den Renaissance Conference Center, a invita tur presente pa Renaissance Festival Plaza na unda ATIA a percura pa algun snacks y algo di bebe pa tur presente. Riba e fotonan por aprecia algun di e invitadonan cu tabata presente durante e anochi exitoso aki.