ORANJESTAD- Otmar Oduber, miembro di Parlamento di partido AVP elaborando riba e medidanan cu lo bai wordo introduci riba pueblo pa cu AZV, ta bisa cu esaki sigur lo coba e graf di pueblo mas hundo ainda, un graf cu esnan di partido MEP den gobierno a bin ta cobando pa 7 aña largo caba.
Tur e medidanan cu MEP a bin ta impone riba nos comunidad pa asina por haya placa, no pa inversionnan of desaroyo di nos isla, sino pa duna friends & family ta matando nos hendenan. A bin ya caba cu aumento di prima di AZV, aumento ridiculamente halto di e servicionan di gobierno, aumento di invoerrechten, aumento di accijns riba gasolin, BBO y awor nan kier bin cu mas medida pa cu AZV.
Minister Nilo Swaen a bisa diamars cu e no lo duna mas placa pa indexering pasobra e no kier coba e graf di Pais Aruba, pero ta parse cu e ta bibando na otro pais of mihor bisa na otro mundo, pasobra e graf di Pais Aruba a wordo coba hopi tempo pasa caba y en bes di purba rebiba nos hendenan, nan ta coband’e mas hundo ainda pa asina evita cu nan por sali.
Otmar Oduber ta puntra Nilo Swaen y Booshi Wever( kende mientras tanto a duna indicacion cu e medidanan lo bin), ta con nan kier pa p.e. un mama soltera cu dos yiu y salario minimo paga huur di cas, awa, coriente, gasolin, cuminda, transporte, scol, paña, etc y riba dje si un di nan bira malo tover 10 florin di eigenbijdrage pa dokter di cas, sigui pa tover un otro 5 florin pa cada remedi cu e dokter a manda y esey si nan tin suerte cu e remedi ta cai den e lista positivo di Booshi Wever.
Mescos e ta mustra ta con e hendenan aki lo kier pa un persona grandi cu lo mester wordo manda pa exterior pa operacion biaha su so, pasobra AZV no lo cubri gastonan di acompañante mas. Si algo pasa cu e pacient aki den exterior ta ken lo tey pa yude?
Otro ehempel cu Otmar ta duna ta si un persona cu pa motibo di diabetes perde su pia y mester di un protesis, AZV no lo paga pa esaki tampoco.
Ta kico e persona aki mester bai haci e ora? E lo mester bai busca onderstand, pasobra e no tin manera pa move, of si no bai purba haci un fund raising pa asina wak si por sera placa pa logra yega na esaki.
Ta tristo pa mira con e gobernantenan keto bai ta prefera di sigui impone medida riba nos hendenan en bes di baha e gastonan haltisimo cu nan tin, simplemente pa sigui beneficia friends& family. Y no solamente esey, nan ta sigui nombra nan famia y amigonan cu salarionan astronomico, pero di otro banda ta bai den saco di nos hendenan pa paga e deficit di AZV, Otmar Oduber a finaliza bisando.