BUCAREST, Rumania, - Presidente di Merka, George W. Bush, a sufri un dòbel revés durante e promé dia di kumbre di “Organisashon di Tratado di Atlántiko Nort” (OTAN) ku ta realisando na Bucarest, Rumania.
Bush su idea di habri porta pa dos eks repúblika soviétiko Georgia i Ukrania pa aliansa militar di Oksidente, a keda rechasá pa miembronan di e organisashon durante sena di trabou ku a habri e kumbre.
Oposishon prinsipal a bini di parti di Kansier di Alemania, Angela Merkel, kende a bisa ku e medida ta prematuro teniendo na kuenta ku apoyo popular pa OTAN dentro di Ukrania ta ménos ku 30% i ku Georgia no ta kontrolá su teritorio kompletu debí na konfliktonan ku separatistanan.
Fransia a respaldá opinion di Alemania, ounke vários Hefe di Estado i di Gobièrnu reuní na Bucarest a insistí ku no ta trata si Georgia i Ukrania afiliá na OTAN, sino ki dia.
Sin embargo, un alto diplomátiko georgiano a bisa ku “no” pa Georgia n’e momentu aki, lo por keda interpretá komo viktoria pa Mosku, ku ta mira ku preokupashon ku OTAN por ekspandé te na su fronteranan.
Gresia a dal otro gòlpi kontra aspirashonnan di Bush dor di oponé entrada di Macedonia n’e aliansa, debí na disputa riba nòmber di e eks repúblika yugoslavo, ku ta koinsidí ku provinsia griego.
Analistanan ta konsiderá ku blokeo kontra Macedonia lo por desestabilisá region di Balkannan, ounke si OTAN rekonosé Kroasia i Albania p’e Plan di Akshon pa Afiliashon (MAP, abreviashon na ingles), e etapa preliminar pa pleno entrada n’e organisashon.
Sin embargo, no ta tur kos tabata asina negativo pa metanan di Bush.
Apesar ku Fransia a oponé ekspanshon di OTAN pa ost, e pais aki a konfirmá ku lo manda un batayon pa Afganistan, reforsando trupanan di e aliansa den e mishon mas krusial di seguridat n’e pais asiátiko.
Segun bosero di OTAN, Presidente franses Nicolas Sarkozy a ofresé manda asta 1.000 sòldá n’e region ost afgano, pèrmitiendo Merka desplegá su forsanan na sùit, kaminda ta realisando e konfrontashonnan mas serio ku Taliban.
E medida ta satisfasé kondishon di Canada pa mantené su trupanan na Afganistan, despues ku Canada a menasá ku lo retirá su sòldánan si otro paisnan miembro no kontribuí ku mas sòldá.
Awe lo invitá Kroasia i Albania pa negoshá nan entrada
N’e apertura di kumbre atlántiko, awe lo invitá Kroasia i Albania formalmente pa negoshá nan entrada na OTAN.
Sekretario general di OTAN, Jaap de Hoop Scheffer, a pone énfasis ku Europa mester keda uní i “safe”, dor di referí n’e propósito di sigui inkorporá miembronan nobo.
Bush a saludá Zapatero
Bush n’e kumbre a saludá Hefe di Gobièrnu spañó, José Luis Rodríguez Zapatero, ku “hola, hola, felicidades”.
Segun fuentenan, ámbos dirigente a akordá mira otro meimei di luna di mart, pero ainda nan no a haña okashon di reuní.

Foto: George W. Bush i Condoleezza Rice 0304

Presidente merikano George W. Bush i Sekretaria di Estado di Merka Condoleezza Rice ku kabes abou na kumbre di OTAN na Bucarest awe.