WILLEMSTAD - “Falta di diplomasia i arogansia pa e manera kon a atendé anunsio di kambio di fecha 15 desèmber 2008. No mester a hasi esaki na Hulanda, pero lo tabata bon pa sekretario di estado sra. Ank Bijleveld por a komuniká ku e partnernan den e negosiashon”, tabata deklarashon di Lionel “Paps” Capriles den entrevista ku LA PRENSA.
Segun Paps Capriles e ta di akuerdo ku no mester hasi algu purá purá, pa no resultá robes, pero e kambiamentu di fecha ta kibra speransa i pone ku hende ta pensa ku kos no ta kanando bon. Ademas si mester keda kambia, asina lo por pone hende fada di e trayekto di kòmbersashonnan ku ta tumando lugá riba futuro struktura estatal di Kòrsou. E impreshon ku a bin dilanti ku ‘sòpi purá ta salu” enbèrdat ta un echo, pero e forma ku esaki a keda atendé pa e sekretario di estado mester a enbolbí esnan di e islanan, enbes di anunsiá esaki na Hulanda pa despues e sali den publisidat manera ta e kaso.
Awor mester yega na bon entendimentu promé ku bai nombra otro fecha. E próksimo fecha mester ta unu sigur, ya ku no mester tin kambio na kaminda. Ta bon pa sinta huntu palabrá e trayekto di kòmbersashonnan nobo di manera ku por evitá ku ta bin un kambio den e di tres fecha ku mester keda anunsiá. Mirando ku awor a kambia e fecha pa di dos biaha ta duna indikashon na otronan ku a dura hopi i ku por tin hende kompletamente di akuerdo ku e forma purá lo tin su konsekuensianan.
E falta di diplomasia i arogansia den henter e asuntu aki, mester a keda manehá diferente. No ta Hulanda mester a anunsiá e kambio aki, pero tur e partnernan di negosiashon huntu mester a saka esaki, pa evitá ku tin e efekto manera e tin aktualmente. Mester a pone tur hende na altura i pa despues anunsiá esaki konhuntamente, tabata deklarashon di Lionel “Paps” Capriles na LA PRENSA.