Lorito ta yama tur hende un felis djaweps. Awe Lorito a skibi, skibi i skibi. Nos patanan a keda hasi masha doló. Tin dia t’asina, pasobra ta skibiendo nos ta duna tur informashon.
*********
Entrante awe nos no kier pa yama nos Lorito mas, pero Profesor Lorito. Ora nos a tende ku den Korte un abogado a bisa ku un polítiko ku a haña nombramentu polítiko tin un “denkvermogen” masha haltu, siendo ku nos no a ripará esei, anto no a keda nada otro di outoproklamá nos mes komo Prof. Dr. Mr. Ir. Lorito! Lagami!
*********
Komo ku awor nos ta doctor “honoris causa autoproclamarum” nos por disidí hopi kos pa nos mes. Hende no por konta nos kiko ku ta kiko mas. Nos ta kuminsá ku Don Hugo na TeleKòrsou ku a bin ku un storia ku sigur nos no a kumpra. Kontrali na loke Don Hugo a deklará, Tele-8 a pèrdè den e kaso di Marazul. Konstantemente nan a insistí ku pa nan ta 1 ganadó so tin antó esei ta Joella. Ayera sin embargo tòg Tele-8 a paga Ratan ‘un montante’ ku nan a palabrá di lo no divulgá. Fo’i ora bo lòt un kas, antó un hende gan’é, pero na final bo tin ku paga ‘un montante’ èkstra no na un, pero na dos ganadó, bo a pèrdè pa definishon. Ademas nos tin gana di sa ta ken ta bai paga e gastu èkstra aki!
*********
Nos a haña straño ku awe a kuminsá un konferensha ku embahadornan di nos área i ku Maxime Verhagen no a bin. A anunsiá ku masha fanfare aña pasá ku minister Verhagen (e minister di Relashonnan Eksterior di Reino) mes lo ta presente. E kaso ta demostrá un biaha mas, ku Ulanda no ta masha interesá den nos kosnan. Probablemente Verhagen a haña un reunion di NATO mas importante! No wòri, nos mes ta sigui atendé nos problemanan, pero ora tin problema den nos área, no reklamá!
*********
Bo ta kere ku na Aruba tin un eksperto di poldermodel presente, ku hasta a tene un diskurso i Aruba no por haña un solushon pa su konflikto laboral di algun siman kaba? Loke Aruba mester ta un “salinja model”. Hopi lodo, sigui chambuká bai! Anto wes a bin ku un novedat: un skèdjel pa akshon. Ni karni ni piská! Ko’i grita hari!
*********
Tur kaminda ta plamando e e-mail di un dama ku for di 2005 a informá na Venezuela riba e peliger di sekuestro pa usa e órganonan aki. Loke a pasa ta, ku den e kaso aki a pone tur nòmber di Venezuela hasi komo si fuera ta na Kòrsou e kaso aki ta pasando. Nos a haña un e-mail for di Aruba (di un kolega periodista!) ku a puntra nos kiko ta bèrdat. Shonnan, aki ta trata di un kos eksagerá i ku no ta pasando na Kòrsou.
*********
Lorito ta preokupá pa e kasonan di damanan ku ta hasi nan kurpa bunita i ta krea yen di problema pa nan mes. Ata poko dia ei, nos a topa un ku nos no a rekonosé mes. Nos a sinti bèrgwensa, pero despues nos a bisa ku ta e mester tin bèrgwensa ku el a kambia tur loke Dios a dun’é (na abundansia) di e forma aki. Lorito ta pidi nos damanan pa wak e asuntu aki masha bon. I kòrda ku bunitesa interno ta mas importante i esei ta algu ku bo no por drecha ku niun tipo di Botox.
*********
E dama ku a hinka su mes den un aventura di porno i ku awor ta riba Internet, a hinka su mes den un problema masha serio. E dama ta un maestro di skol. Lorito a tuma nota di e fotonan i korektamente su doño di trabou a disidí pa suspendé pendiente un desishon final. Ki e muchanan di su klas lo bisa, si nan tambe tuma nota di e pòtrètnan aki? No yama Lorito pa niun pòtrèt, pasobra nos si no ta kere ku mester sigui plama e tipo di informashon aki!
*********
Nos ta keda te aki awe. Kòrda riba nos adrès na loritotabula@yaoo.com pa tur informashon ku nos sa òf no sa ainda. Nos ta keda te aki awe. Kòrda kuida kurpa, duna un bon ehèmpel, wak pa bo yunan alkansá lo máksimo den nan bida i stima bo mes promé. Te mayan ku Dios su poder!