WILLEMSTAD – E proseso di inventarisashon na Las Almas ta kasi kompleto, asina Gobièrnu di Kòrsou a informá awe. Dianan 20 i 22 di mart último gobièrnu a duna oportunidat pa habitantenan di Las Almas registrá e tereno i òf konstrukshon ilegal ku nan a okupá. Apesar di esaki Domeinbeheer i DROV no a yega na final di e inventarisashon, pasobra ainda falta algun bibienda ku no a registrá.
Pa e motibu aki, djabièrnè 4 di aprel próksimo, trahadónan di Domeinbeheer lo kana henter dia den e bario di Las Almas pa nan pasa kas pa kas i asina e habitante ta haña oportunidat di registrá. Un biaha mas ta ripití, ku registrashon no ta nifiká ku outomátikamente e okupashon i konstrukshon ta bira legal, pero si e ta yuda duna un bista amplio riba e situashon di Las Almas.
P’esei un apelashon ta bai na tur habitante ku ainda no a registrá, pa tene kuenta ku trahadónan di Domeinbeheer lo aserká esnan ku no a bin registrá ainda djabièrnè dia 4 di aprel. Pues, sòru pa un hende ta presente na e bibienda ku e dokumentunan konserní.
Si akaso no haña niun hende na e bibienda, lo laga un karta i e habitante por akudí por último djaluna dia 7 di aprel durante oranan di ofisina na ofisina di Domeinbeheer na Klipstraat den Otrobanda. Gobièrnu ta fasilitá e habitantenan di Las Almas ku e delaster oportunidat aki, pues hasi uso di dje.