WILLEMSTAD – Awe mainta a disidí ku sindikatonan ku ta preshonando Gobièrnu di Aruba por drenta den akshon, basta esei no ta afektá servisionan básiko importante pa e isla. Den e kaso aki wes a traha un tipo di skèdjel bou di kua kondishon diferente di e sindikatonan di e Plataforma Sindikal di Aruba por tene nan akshon. Den algun kaso nan mester duna anunsio di nan akshon algun ora promé i den fin di siman hasta ku mas antisipashon.
Den sierto sentido por bisa, ku wes no tabata ni karni ni piská den e kaso aki, pero despues di algun siman di akshon sin konklushon, e ta haña ku e mester sali na defensa di komunidat, prinsipalmente pa motibu di servisionan básiko ku ta masha importante pa un sosiedat, manera polis i brantwer.
No tabata masha kla mesora ki reperkushon e anunsio lo tin, ounke ku anteriormente ya kaba e sindikatonan a informá ku nan lo sigui den akshon. E sindikatonan den sektor públiko ta hibando un lucha di algun siman pa preshoná Gobièrnu di Aruba pa ahustá nan salario na oumento di kosto di bida. Gobièrnu di Aruba a ninga di kumpli te awor, indikando ku un ahuste lo nifiká gastunan adishonal haltu pa presupuesto di Aruba di den kareda di 150 mion florin. Nos tin mas detaye den nos sekshon di Aruba di awe.