RIO DE JANEIRO, Brazil, - Epidemia di dengue a afektá 57.000 i a kousa 67 morto na e Estado brasileño di Rio de Janeiro kompletu pa loke ta trata aña 2008, Sekretaría di Salú estatal a informá den último balans riba e enfermedat provoká pa piká di muskita.
Servisionan sanitario ta alertá poblashon pa mantené nan mes leu for di muskitanan ku ta kousa dengue.
E anunsio a konfirmá 13 morto mas for di e último relato di Sekretaría di Salú di Rio emití 26 di mart último, sin embargo no a registrá mas morto pa dengue for di djaluna último.
Ta investigando otro 58 morto pa determiná si nan a keda provoká pa e enfermedat.
Situashon di Rio de Janeiro ta sobresaliente.
Kantidat di kaso di Rio de Janeiro ta kasi tres bia superior di e kasonan registrá aña pasá den e mesun periodo.
E siudat di Rio de Janeiro, kapital di e estado, tabata e siudat ku a registrá mas kaso (36.647), siguí pa munisipionan di Angra dos Reis (3.711), Nova Iguazú (3.643), Campos (2.505), Duque de Caxias (1.405) i Sao Joao de Meriti (1.396).
Kantidat di morto konfirmá na e kapital tambe tabata mayó 44, kontra 23 den interior.
E 67 mortonan konfirmá, 21 tabata pa dengue di tipo “hemorrágico”.
Entre e víktimanan fatal tin 32 menor di 13 aña.
E enfermedat ta konsentrá n’e barionan mas pober, kaminda e habitantenan komo kustumber sa akumulá awa potabel.
Dengue ta un enfermedat viral transmití pa piká di muskita.
Outoridatnan a anunsiá oumento di oranan laboral di 900 profeshonal di salú, apertura durante fin di siman di 83 pòst di atenshon i distribushon di sustansianan kontra insektonan.
A inougurá un hospital nobo djaweps.
Gobernador di Rio de Janeiro, Sergio Cabral, a anunsiá ku por solisitá dòkternan di Cuba, pero el a atvertí ku e lo warda te djadumingu ora profeshomalnan konvoká di otro sinku estado brasileño yega, pa evaluá nesesidat di dòkternan estranhero.
“Fin di siman nos lo hasi un evaluashon di e konvokatorio aki. Nos no por pèrdè tempu. Cuba tin un ekselente tradishon n’e área di salú públiko, i tradishon di solidaridat ku e pueblonan ku ta presisá su apoyo”, Cabral a bisa.
A divulgá e datonan nobo despues ku a instalá tres hospital den tiendanan di kampaña montá pa militarnan pa atendé mas o ménos 500 persona pa dia, i konfrontá e epidemia ku a kòlèps e sistema sanitario di e Estado.
P’e kantidat kresiente di pashèntnan ku síntomanan di enfermedat dengue i e filanan largu na hospitalnan a obligá outoridatnan tuma medidanan di emergensia.
P’esei a inkluí intervenshon di mas o ménos 1.200 efektivo di Ehérsito, Marina i Aviashon pa ousiliá den servisionan sanitario i fumigá áreanan di riesgo.
Ministerio federal di Salú siman pasá a anunsiá ku lo kontratá 661 profeshonal komo parti di un plan di emergensia kontra e epidemia, konsiderá “grave”, i ta esun mayó den historia di estado di Rio de Janeiro.
Hustisia algun dia pasá a konsiderá ku outoridatnan di Rio tabata “negligente” p’e epidemia, i a duna òrdu pa e estado paga gastunan di e personanan malu interná na hospitalnan privá.

Foto: Brazil dengue 0404

Muchanan ta para wak un bòter di glas ku muskitanan. Servisionan sanitario ta alertá poblashon pa mantené nan mes leu for di muskitanan ku ta kousa dengue.