WILLEMSTAD - Durante e wikènt di 4 pa 6 di aprel benidero apròksimadamente 120 piskadó deportivo lo partisipá na e LUHRS 42nd Annual International Blue Marlin Release Tournament organisá pa Curaçao Yacht Club i patrosiná pa LUHRS. E torneo ta lokalmente pero sigur tambe internashonalmente bon konosí anto hopi popular den mundu di piskería deportivo. Despues di e torneo di Puerto Rico e ta esun di mas bieu den region.
Piska riba e Blue Marlin of simplemente yamá BLUE òf Balaú, ta hopi mas ku solamente suerte. Piskadónan kontinuamente ta buska téknika i métodonan nobo pa ta mas sabí ku e Blue. Kada detaye ta importantísimo i ta kos chikitu ta hasi e diferensha ku finalmente ta logra barka e piská si òf no. Pues mester prepará debidamente.
Release Tournament
Peska lo ta di e sistema di ‘Tag & Release’. Esei kier men, ku tur piská kapturá bou di 300 lbs mester wòrdu released. Kier men 'los laga bai'! (E yate mester di saka un pòtrèt pa konfirmá ku nan a laga un Balaú bai.) Esaki pa e motibu ku asina ta laga e bestianan den libertat i no ta menasá nan eksistensia. Bou di e peso aki nan por reprodusí ainda, loke ta pone ku kada unu ku ta ser matá kier men un chèns mas chikitu pa nan reprodusí. E deporte di peska ta otro for di e peska profeshonal. Ta pa evitá ku e piskánan ta wòrdu matá sin ku tin nodi, ta piska mundialmente - pues na Kòrsou tambe - segun sierto reglanan ku ta kuadra ku reglanan internashonal di preservashon di piskánan.
Partisipantenan
E torneo ta di un nivel serio. Lo tin mas o ménos 40 yate di Ariba, Boneiru, Venezuela i Kòrsou ku mas o ménos 120 piskadó partisipando. Deportistanan grandi den e deporte di peska ta topa. No solamente deportistanan grandi lokal, pero tambe grandinan di Aruba Boneiru, Venezuela, Merka, i tambe di Europa lo topa den e enkuentro deportivo kaminda ya pa hopi aña tur ta topa otro den eksterior i ta hopi rekòrt a wòrdu kibrá, no solamente den peska, pero tambe den amistatnan ku a nase i krese bira grandi den deporte aki na Kòrsou. Danki na nos deportistanan lokal, hopi ta esnan ku konosé Kòrsou. Amistatnan ta bai rònt mundu E torneo di Curaçao Yacht Club ta unu di nivel haltu tambe, pasobra spònsernan ta sostené e torneo ku masha entusiasmo. Den spònsernan tin nòmbernan grandi manera, LUHRS, Atlas Insurance; CUROIL, Auto City; Superclub Breezes, Napa, Kusters Trading Dynaf, Jonckheer Advertising; Coca Cola; Zetraco; Hector Henriquez BV, Florida Express, Licores Maduro, Bonsai, AD Jonckheer i UTS. Tur a skohe pa forma parti di e torneo di peska di un nivela haltu aki.
Curaçao Yacht Club 803 Challenge
Curaçao Yacht Club huntu ku AUTOCITY B.V. a sera un akuerdo di spònser pa pone un Chevy Tahoe 2008 pa e famoso Curaçao Yacht Club 803 Challenge. Esaki ta un reto di kibra e rekòrt di Blue Marlin di 803 liber ku ya tin 23 aña kaba.
Esun – e promé - ku kibra e rekòrt di Robert van Vliet ku tempunan ayá (1985) a lanta un Blue di 803 liber kompletamente segun reglanan di torneo, ta bai kas ku un Chevy Tahoe 2008. Mirando ku e challenge aki no ta fásil lo tin un premio di $5000 pa e promé piskadó ku barka un balaú di mas ku 500 lbs.
Premionan
E ekipo ganadó ku a kohe mas tantu Balaú lo gana un premio di $10.000. E di dos premio ta $3,000 i e di tres premio ta $1500. Tambe lo tin premionan kèsh pa e promé i delaster balaú kohe plùs kopa pa tur otro premio.
Programa
E siman di e LUHRS 42nd Annual International Blue Marlin Release Tournament lo inkluí yegada di partisipantenan internashonal, yegada di yatenan di afó, Riba djabièrnè Kapitannan i nan tripulashon, demas bishitantenan, lo tin inskripshon, nochi di apertura anto naturalmente dos dia tremendo di peska den awanan rònt Kòrsou. Riba djasabra lo tin peska pa chikitunan tambe kaminda ku nan por (siña) piska riba pirnan di Curaçao Yacht Club. Djasabra mainta 7’or e torneo ta kuminsá I lo terminá 5’or di atardi. Djadumingu lo ta e di dos i último dia di peska. Lo tin piskamentu for di 7’or te 3’or di atardi. Djadumingu, atardi 7’or lo tin e seremonia di premiashon anto un komementu pa klousurá.
Donashon
Tur benta di piskánan kohé den e torneo ta bai na Kinderoort Brakkeput
Curaçao Yacht Club ta yama bishitante nan bon biní
Normalmente Curaçao Yacht Club ta pa miembro so, pero durante e torneo di peska tin posibilidat pa drenta i sinti poko di e atmósfera di deporte de peska. Grandinan i tambe e chikitunan tin hopi kos di mira i hopi kos di konta.
Pues dianan 4 pa 6 di aprel próksimo, e LUHRS 42nd Annual International Blue Marlin Release Tournament, na Curaçao Yacht Club.