LONDEN – E ekipo ulandes PSV a saka un resultado pa su wega na kas kontra e ekipo Fiorentina, empatando 1-1 na Italia. Pero e ekipo a haña un sla inesperá ku leshon di su kiper Gomes. Ta bin aserka ku e hungadó peruano Jefferson Farfán lo keinta banki e próksimo wega pa akumulashon di karchi hel.
Den otro weganan Cosmin Contra a anotá na di 90 minüt i Getafe di Spaña a logra un meritorio empate di 1-1 kontra Bayern Munchen den e promé partido di kuarto di final pa Kopa UEFA. Fiorentina a empatá 1-1 na kas ku PSV Eindhoven, Zenit di Sint Petersburg a goliá Bayer Leverkusen 4-1 na kas, miéntras ku Sportin Lisboa a empatá sin gol ku Glasgow Rangers den e etapa di 8 mihó ekiponan ku ta na bida ainda den e torneo. E próksimo enkuentronan lo tuma lugá dia10 di aprel awor na Madrid, Eindhoven, Sint Petersburg i Lisboa.
E gol di e rumano Contra na momentu ku ya kaba e wega tabata agonisando a hasi hustisia den markadó di e partido komo ku e klup chikí spañó a dominá Bayern Munchen, e ekipo mas poderoso di Alemania i un gigante na Oropa. Contra a rematá ku un bala suave despues di un seri di robete i rechaso den e área defendé pa e kiper aleman Oliver Khan. E brasileño Lucio i e argentino Martín Demichelis a trata den forma enbano pa detené e bala den su trayektoria pa gol. E italiano Luca Toni a habri e markadó pa Bayern na di 26 minüt di wega, na momentu ku el a kabesá un tiru di skina di Bastian Schweinsteiger. E italiano ta e máksimo goliadó di Kopa UEFA ku 8 gol, e mesun tantu ku e delantero di Zenit Pavel Pogrebnyak tin na e momentunan aki.
Na Florence, Adrian Muti a risibí un pase largu di Giampaolo Pazzini i a saka un tiru dirigí riba e kiper brasilenjo di PSV, Gomes. E kiper a rechasá e bala den promé instansia, pero na momentu ku e bala a rebotá den e delantero rumano i a drenta den gol na di 56 minüt di wega. PSV ku a konta ku e mehikano Carlos Salcido, e ekuatoriano Edison Méndez i e peruano Jefferson Farfán den su aliniashon, a empatá kuater minüt despue di un remate fuerte di Danny Koevermans. Farfán lo pèrdè e próksimo partido pa akumulashon di karchi hel. “Nos a trata di kòrta nan paso, pero nan ta un gran ekipo. Awor nos tin ku bai Ulanda i trata di hinka un gol i gana e partido”, asina e tékniko di Fiorentina Cesare a bisa. Un problema pa e ekipo ulandes tabata ku su kiper estelar Gomes a resultá seriamente leshoná den e enkuentro di ayera.
Zenit ta un pia kaba den semi final ku su fiesta di gol na kas kontra Leverkusen. Pogrebnyak, Andrei Arshavin, Aleksandr Anyukov i Igor Dunisov a anotá pa e kampion ruso, miéntras ku Stefan Kiessling a deskontá pa e alemannan. Miéntras tantu Glasgow Rangers i Sportinn no a hasi daño na nan kara pa nan próksimo partido den e kapital portugues.