ASUNCION – E Konfederashon Sud-Amerikano di Futbòl a ripití su desishon ayera ku e lo no prohibí partidonan di su torneonan na nivel di klup den suidatnan ku ta hopi haltu riba nivel di laman. “ E komité ehekutivo a reuní i a disidí unánimamente ku Copa Libertadores lo hunga normalmente na La Paz, Quito i Cusco di akuerdo ku reglamentunan vigente i aprobá anteriormente”, asina presidente di Conmebol Nicolás Leoz a bisa den un konferensha di prensa.
FIFA a prohibí disputa di partidonan pa e eliminatorionan mundialista den e suidatnan ku ta mas haltu ku 2750 meter riba nivel di laman, a ménos ku tin periodonan di aklamatisashon. FIFA a rekomendá Conmebol pa hasi mesun kos pa su kampionatonan regional, pero e organismo di futbòl sud-amerikano a rechasá e rekomendashon. “Conmebol ta soberano komo ku e ta un organisashon regional”, asina e paraguayo Leoz a bisa. El a atvertí, ku si den Copa Libertadores kualke ekipo ninga pa kumpli ku nan kompromiso den kualke di e suidatnan ku ta riba 2750 meter riba nivel di laman nan pèrdè punto. Ademas lo imponé un multa i nan lo keda pafó di e torneo pa e próksimo 3 añanan.
Leoz a bisa ku e presidentenan di e asosashonnan di Argentina, Paraguay, Bolivia, Chile, Ecuador, Colombia, Venezuela, Perú i Uruguay a firma un nota pidiendo Conmebol pa eksigí di FIFA ku ta eliminá e prohibishon pa weganan eliminatorio na La Paz (Bolivia) ku ta keda 3600 meter riba nivel di laman i Quito na Ecuador ku ta riba 2820 meter.
"Ricardo Teixeira, presidente di e Konfederashon Brasileño tabata e úniko ku no a firma e dokumentu, alehando ku e no por hasi algu ku e mes no ta di akuerdo kuné. Nos ta respetá su posishon”, asina Leoz a bisa.
Anteriormente ya kaba Teixeira a bisa ku e no ta kere ku por tene partidonan na La Paz i Quito komo ku supuestamente nan ta afektá kondishon físiko di e hungadónan. Despues di e reunion di e komité ehekutivo, Teixeira no a papia ku periodistanan i a sali for di un porta na banda.