BOGOTA, Colombia, - Súplikanan di Fransia n’e mayó gueria di Colombia pa entrega inmediato di eks kandidata presidensial Ingrid Betancourt, kende ta gravemente malu, a keda den limbo, despues ku e Hefe rebelde a atvertí ku solamente e dama polítiko por sali liber si tin un akuerdo polítiko.
Anunsio di Hefe di “Fuerzas Armadas Revolucionarias de Colombia” (FARC), Rodrigo Granda, a tuma lugá despues ku un avion ku mishon médiko organisá pa Fransia, ku ta buskando yega te na e selva i atendé e dama sekuestrá, a yega Bogotá den e promé fase di e operashon.
“Solamente komo konsekuensia di un interkambio di presunan, esnan sekuestrá den nos kampamentunan lo sali liber”, Granda a bisa, kende ta dirigente di FARC, ekskarselá pa Gobièrnu di Presidente Alvaro Uribe meimei di aña 2007.
“Lo no bai tin enkuentro Gobièrnu-gueria, por ehèmpel, sin eksistensia di un zona desmilitarisá”, Granda a bisa.
“No ta atmisibel pa pidi nos mas gesto di pas ora, despues di nos boluntat polítiko pa enkontrá salidanan p’e konflikto ta kontestá nos ku infamianan i malefisiensia”, Granda a afirmá den un artíkulo publiká den Agencia Bolivariana de Prensa, ku previamente sa publiká artíkulonan i komunikadonan di FARC.
Granda a referí n’e liberashonnan unilateral di seis rehen, entre nan eks kompañera di fórmula di Betancourt, Clara Rojas, gestonan ku tabata resultado di mediashon di Presidente di Venezuela Hugo Chávez i dama senador colombiano Piedad Córdoba.
Despues di e operashon militar di Ehérsito colombiano na teritorio ecuatoriano 1 di mart último ku a mata number dos na mando di FARC, Raúl Reyes, aparentemente a pèrdè kontakto direkto ku negoshadónan di e grupo armá, ya ku ta konsiderá e gueriero morto klave den e avansenan ei.
Un avion tipo Falcon a aterisá na aeropuerto militar di Catam, situá wèst di Bogotá, ku personal médiko ku tin e mishon di atendé Ingrid Betancourt, kende tin nashonalidat franses i colombiano.
Betancourt, e dama rehen polítiko mas famoso na nivel mundial, tin mas ku shete aña sekuestrá pa FARC.
Súplikanan i infleksibilidat
FARC ta buskando negoshá ku Gobièrnu di Presidente Alvaro Uribe un akuerdo humanitario pa libra 40 persona sekuestrá pa motibunan polítiko, inkluyendo Betancourt i tres merikano, ku kambio di ekskarselashon di 500 gueriero.
Pero e posishonnan infleksibel di e partinan a stroba pone fin na drama di e rehennan, algun di nan tin mas ku dies aña sekuestrá.
Presidente Uribe ta ninga retirá su Forsanan Armá for di un zona di seru di 780 kilometer kuadrá, situá na sùit di e pais, pa establesé un lugá “safe” kaminda delegadonan di e partinan por negoshá un akuerdo pa un interkambio di presunan.
Yegada di e mishon médiko na Colombia a okurí dos dia despues ku Presidente di Fransia, Nicolas Sarkozy, a pidi e lider máksimo di FARC, Manuel Marulanda, libra Ingrid Betancourt, di 46 aña, i mama di dos yu.
Di akuerdo ku Presidente Sarkozy, e dama polítiko franses-colombiano ta gravemente malu, i ta rekirí atenshon médiko urgente pa riesgo inminente di morto.
Presidente Uribe a komprometé su mes pa suspendé e operashonnan militar na un zona spesífiko ku nan lo inform’é previamente pa fasilitá gestion di e mishon médiko.
Miéntras tantu, e avion Falcon ainda ta na base aéreo militar di Catam na Bogotá, en espera riba òrdunan pa kontinuá su mishon humanitario.
Ayera nochi, Presidente venezolano Hugo Chávez a bisa ku e ta mira e mishon aki “ekstremadamente kompliká”.
“E situashon ta hopi, hopi, hopi kompliká! Ekstremadamente kompliká!”, e mandatario venezolano a bisa den diskurso, i el a sigui bisa ku FARC ta deskonfiá di Gobièrnu colombiano i el a ripití su boluntat di “kolaborá” pa liberashon di esnan sekuestrá.
Dia 28 di mart último, Gobièrnu colombiano a anunsiá ku di inmediato lo suspendé kondenanan pa mas ku shen gueriero presu, si FARC libra esnan sekuestrá, spesialmente Ingrid Betancourt.

Foto: Rodrigo Granda 0404

Rodrigo Granda, Hefe di FARC.

Foto; Avion franses na Colombia 0404

Avion franses a aterisá na Bogotá ayera mainta trempan den e mishon pa atendé rehen di FARC, Ingrid Betancourt, kende ta gravemente malu.

Foto: Ingrid Betancourt 0404

Ingrid Betancourt na un lokalidat deskonosí.