WILLEMSTAD/ AMSTERDAM - Rita Verdonk, eks minister di Integrashon den e gabinete Balkenende anterior i kende a hasi su mes kontroversial aki na Antia pa su forma radikal di atendé ku antianonan radiká na Ulanda, ayera a presentá su movementu polítiko “Trots op Nederland” ofisialmente. Anto manera por a spera, e no por a keda sin lansa krítika frontal atrobe riba Antia.
“Plaka pa desaroyo ku Ulanda ta pone disponibel pa Antia, ta simplemente plaka tirá afó. For di momentu ku a instituí Statüt, Ulanda a bin ta pone sèn den e bari sin bòm ku yama Antia. Awor ta basta,” ta loke Verdonk a bisa, kosechando basta aplouso pa su deklarashonnan.
Rita Verdonk, manera entretantu ta ampliamente konosí, a kibra ku su partido original VVD pa motibu di diferensha di opinion serio ku su frakshon den Tweede Kamer.
For di e momentu ei a bira konosí ku e lo lanta su mes movementu, ku despues a bira “Trots op Nederland”, TON.
Ayera, dilanti un públiko grandi, el a presentá e programa di akshon.
Verdonk por sierto a aparesé riba krùk ayera dilanti su simpatisantenan pa motibu di un aksidente ku a sosodé kuné algun dia pasá. Verdonk a slep kai den su kas na momentu ku e tabata labando paña. El a lastimá vários múskulo seriamente, di manera ku awor aki e no por para ni sinta pa un periodo demasiado largu. Pero ku òf sin krùk, mi pensamentunan a keda igual, ta loke Verdonk a bisa, kosechando hopi sosten di esnan presente.
Verdonk a sali bisa, ku e ta konsiderá ku mester redusí e kantidat di asiento den Tweede Kamer di 150 te na 75, o sea, un redukshon di sinkuenta porshentu.
Ademas, Verdonk ke introdusí e sistema – entre otro konosí na Merka – ku ora un mandatario baha, su kuerpo di ámtenar tambe ta baha samsam kuné. Esaki ta konta tantu pa un minister komo un wethouder.
Verdonk ta na fabor tambe pa sea eliminá provinsia òf pa baha e kantidat di tarea te na tareanan esensial di gobièrnu.
Mayornan di muchanan ku a kue kaminda robes mester haña e obligashon di sigui un kurso kon eduká nan yu.
Si ta dependé di Verdonk, partido PvdA lo no haña e puesto di minister di enseñansa pa e próksimo 20 añanan.
E lider di “Trots op Nederland” ta haña tambe ku mester agrupá tur tarea di siguridat bou di un solo ministerio, esta Ministerio di Siguridat.
Meskos ku esei tabata e kaso ku PVV, Verdonk tambe ta haña ku mester introdusí kastigu mínimo.
Verdonk ta haña di otro banda ku lo ta bon pa gobièrnu kuminsá trata siudadanonan ku mas konfiansa i stòp di trata nan komo potensial kriminal.
Un punto notabel ta e hecho ku Verdonk ke pa na Ulanda eliminá loke el a yama e maneho di toleransha i kuminsá goberná e pais a base di reglanan eksistente.
Rita Verdonk ta haña ademas ku mester redusí e presupuesto di yudansa pa desaroyo ku dos terser parti: e sèn ku bira disponibel e ora ei lo bai pa enseñansa i kuido, segun el a bisa.
Manera por a spera, Verdonk a usa palabranan fuerte atrobe kontra hóbennan antiano ku ta formando molèster riba teritorio antiano i el a bisa ku aki tambe mester tuma akshon drástiko, konfirmando di e forma aki ku e ta mantené su liña di pensamentu ku hóbennan antiano problemátiko no por keda mas riba suela ulandes.