WILLEMSTAD - Un reunion importante di Komishon Sentral pa prepará pa tene oudiensia pa asina prepará pa un trayekto ku mester finalisá den konstrukshon di un hospital nobo no por a sigui ayera, pa motibu di e palabra “:hearing” . Nos leinan no konosé e palabra aki i komo tal mester investigá kon ta bai atendé e asuntu aki.
Esei tabata resultado di un enkuentro di kasi un ora ayera mainta den Komishon Sentral di Konseho Insular. E reunion mester a sirbi pa pone e promé paso pa preparashon pa un hospital nobo.
Eugene Cleopa, miembro di frakshon di MAN den Konseho Insular ta hopi desapuntá pa e situashon aki.
Cleopa ta esun ku a tuma e inisiativa pa realisá e seshonnan di informashon aki, kolmo e promé paso den un proseso pa duna un kontribushon pa yega na realisashon di un hospital nobo pa Kòrsou.
Cleopa a splika ku e tin basta tempu kaba ta trahando riba e asuntu aki. E nesesidat pa un hospital nobo pa Kòrsou ta birando dia pa dia mas urgente.
E intenshon di e reunion di ayera tabata pa prepará e prosedura kon ta bai tende tur partido enbolbí den konstrukshon di un hospital nobo, pa asina haña un bon bista di nan pensamentu. O sea, ku e reunion di ayera tabata simplemente un promé paso pa prepará.
For di kuminsamentu e palabra “hearing” tabata un problema, komo ku e no ta aparesé den nos leinan. Pero Cleopa no por kaba di komprondé pakiko e mester bira un opstákulo. Na lugá di e palabra “hearing” por usa otro palabra tòg? El a puntra.
A sali na kla ku e palabra aki no ta aparesé den Reglamentu di Òrdu di Konseho Insular.
Cleopa a bisa ku e ta lamentá e forma ku kosnan a kana. Ta for di aña pasá mi ta hasiendo esfuerso pa pone e proseso aki kuminsá kana, mirando tambe e urgensia di e asuntu aki.
Tur hende ta papia di nesesidat di un hospital nobo. Nos ta tende tur dia di nobo kuantu problema e situashon aktual ta produsí, pero ora yega momentu di bèrdat, nos no ta pone nos skoudernan manera mester ta bou di e trayekto aki, segun Cleopa.
A palabrá ku ta laga Servisio di Asuntunan Hurídiko duna un konseho riba e asuntu aki i a pone djaweps otro siman pa e reunion di preparashon aki tuma lugá.