WILLEMSTAD - Oposishon a demostrá ku e ta nada mas ku hende kobarde. Na lugá di sinta den Konseho Insular, mustra ku nan no ta di akuerdo ku sierto kos, nan a skohe pa bai djòin un grupo di manifestante pafó di Konseho Insular. Esaki no por karga nos aprobashon, asina lider di frakshon di Partido Nashonal den Konseho Insular drs. Gimena van der Gen a reakshoná riba loke a sosodé e siman aki.
Partidonan polítiko di oposishon agrupá den Aliansa Patriótiko a skohe pa no bai e enkuentro ku sekretario di Estado, Ank Bijleveld pero pa tene un manifestashon di malkontentu dilanti Katedral di Pietermaai.
Nan no por a yega dilanti sala di Konseho Insular komo ku polis i SKS a pèrkurá pa sera i protehá Ansinghstraat.
E manifestashon a yega na su fin na momentu ku e manifestantenan a entregá un karta na representashon di Ulanda aki na Antia ku sede na Skalo.
Gimena van der Gen, a lamentá e desaroyo aki.
El a bisa, ku ta inaseptabel ku miembronan di Konseho Insular ta neglishá nan responsabilidat di e forma aki.
“Un miembro di Konseho Insular ta na promé lugá un representante di pueblo. E miembro ta ser paga pa e funshoná komo representante di pueblo. Komo tal, e mester asumí su responsabilidat i traha tambe pa komunidat. Ta inkorekto pa un hende ku ta haña pago, no ta traha pa e sèn aki,” segun Van der Gen.
Van der Gen a mustra, ku loke e miembronan en kuestion mester a hasi ta di laga nan simpatisantenan manifestá pafó, pero nan mes mester tabata paden, pa ekspresá nan malkontentu pa e forma ku kosnan a kana.
Un dje argumentunan ku oposishon a usa pa no presentá na e reunion, ta e hecho ku e tempu ku sekretario di Estado Bijleveld a pone disponibel pa papia, ta práktikamente un apsurdés. Bo no por pone un ora i mei, pa 21 miembro di Konseho Insular papia, inkluso bo mes tambe, asina partidonan di oposishon a indiká.
E miembro di frakshon di Partido Nashonal a bisa ku e tin sierto komprenshon pa e argumento aki, pero ku nos mester realisá mesora ku aki ta papia di un diferensha di kultura entre Ulanda i Antia.
Na Ulanda, segun Van der Gen e kantidat di tempu ku kada miembro òf frakshon ta haña pa papia, ta konsiderablemente ménos ku aki na Antia.
“Den un reunion públiko un miembro hopi biaha ta haña 20 minüt, asta mei ora pa papia riba un solo tópiko. Na Ulanda e kos aki ta hopi ménos. Por lo general ta un par di minüt e miembro di konseho munisipal òf Tweede Kamer ta haña pa papia. Anto den kaso di tratamentu di presupuesto por ehèmpel, ora aki nos ta haña hopi mas tantu tempu, na Ulanda ta un espasio limitá tin,” segun Van der Gen.
No opstante esaki, Van der Gen a bisa ku el a hala atenshon di Ank Bijleveld riba e punto aki. Bijleveld a bisa, ku e ta konsiente di e diferensha, i ku lo weta den ki forma e ta tene kuenta ku esaki den futuro.