WILLEMSTAD – Miéntras ku na Kòrsou te awe no tabatin reakshon riba e zonado kaso di entrada sin base den kas di famia Claret, polis na Ulanda a demostrá kon si mester atendé un kaso asina aki.
Ayera polis na Apeldoorn a drenta den un kas robes i nan a detené un dama inosente. Mando di Polis a bisa, ku e tim a kiboká den porta di entrada di e kas (na Ulanda tur porta di kas por lo general parse mesun kos).
Segun e splikashon, e Tim di Aresto tabatin intenshon di detené un dama di 22 aña di edat ku huntu ku su amigu di 32 aña ta sospechá di ladronisia. Den e kaso di ladronisia aki a bai ku un arma di kandela i munishon. E Tim di Aresto a opservá e kas den kuadro di e investigashon. Na momentu ku un dama a sali for su kas a detené e dama, pero a bin resultá ku ta e bisiña. Despues numa polis a detené e duo sospechoso aki. Pa loke ta trata e dama inosente, polis a manda palabranan di diskulpa p’e i el a haña un bukèt di flor.
Den e kaso di famia Claret, te awe nan no a haña ni un diskulpa, te pa nan haña un bukèt di flor.
E kaso ketu bai no a haña un konklushon. Mando di Polis ta ketu, minister di hustisia ta ketu, Hefe Lokal di Polis ta ketu i awor Ministerio Públiko ta ketu, no opstante ku a entregá un keho ofisial for di dos siman pasá. Famia Claret ta insistí pa haña un klaridat den e kaso aki, ounke esei no a tuma lugá te awe. Kiko ta e problema ku riba un simpel kaso no por duna un klaridat ta un misterio.
Den pasado tabatin diferente kaso di entrada inhustu na kas di hende sin ku e hendenan a haña un diskulpa pa e entradanan aki.
Miéntras tantu LA PRENSA tin entendi, ku e abogado ku tabata yuda e famia tabatin un konflikto di interes den e kaso aki. Aparentemente e ta famia yegá na e lider di e Sero Toleransha Aresto ku a drenta den e kas.


Onderschrift:

Famia Claret ta wardando ketu bai, outoridatnan ta muda.

Un Tim di Aresto ta drenta den un kas robes na Apeldoorn. E dama detené ta haña un diskulpa i un bukèt di flor.