WILLEMSTAD – Oposishon ta disgustá pa e hecho, ku Gobièrnu di Kòrsou a kore organisá un reunion pa duna sekretario di Estado Ank Bijleveld tur informashon riba Refineria Isla, pero oposishon mes ku tin algun siman ta pidi pa haña informashon, no a haña oido te awe. Sra. Bijleveld ta bou di preshon enorme di Tweede Kamer pa hasi algu na e situashon di polushon di Refineria Isla.
Konsiderando e desaroyonan aki, e partidonan MAN, Niun Paso Atras, Forsa Kòrsou, Pueblo Soberano i Partido Democraat a pidi un reunion públiko awe riba e tema aki.
Den nan petishon na presidente di Konseho Insular, e partidonan ta bisa ku desaroyonan rondó di maneho general, benta i mantenshon di Refineria di Kòrsou ta al órden di dia den medionan di komunikashon. Algun di nan ta:
• Komishonnan pa hiba kòmbersashonnan ku PDVSA ta keda eliminá, otronan ta keda instalá, sin ta duna rason pa esakinan.
• Miembronan eksperto ta keda retirá i otronan inkorporá, tambe sin duna rason di esakinan.
• Diputado ta duna di konosé, ku presidente komisario ta hasi biahe pa Venezuela pa hiba kombersashon i no ta pone na altura promé ku e biahe di kontenido di e kòmbersashonnan aki.
• Ta menshoná nòmber di diferente kompania ku ke partisipá komo partner stratégiko, kaminda tin diferente indikashonnan di konflikto di interes entre esakinan i esnan ku ta hibando kòmbersashonnan i/òf konsehá Refineria di Kòrsou i/òf Bestuurscollege i Gobièrnu Sentral.
• Sekretario di Estado ulandes, sra. Ank Bijleveld, ta bin pa tres dia i mesora ta haña presentashon, splikashon i informashon enkuanto e intenshonnan di gobièrnu pa loke ta trata Refineria di Kòrsou.
• Reunionnan ku miembronan di gerensia i direktiva di PDVSA ku mester tuma lugá na Kòrsou durante di e bishita di sra. Bijleveld, ta keda posponé etc etc.
Tur esakinan, miéntras ku representashon di pueblo i pueblo mes komo doño di e kompania ta keda rei kiko ta (bai) sosodé ku un di e fuentenan mas importante di su ekonomia. Preguntanan fundamental manera kon nos ta mira e ròl di e kompania pa nos ekonomia i nos relashon ku otronan den e mundu petrolero no ta keda kontestá òf no ta haña klaridat. Ta remarkabel tambe e echo, ku miembronan di Konseho Insular ta pidi un reunion for di dia 27 di febrüari 2008 riba e tema aki i ku presidente di Komishon Sentral ta pidi na su turno for di dia 28 di febrüari na diputado enkargá ku Refineria di Kòrsou pa duna un fecha pa e reunion i te ku awe, mas ku un luna despues, e petishon aki no a keda honrá, miéntras ku e mesun diputado aki di otro banda mesora ta disponibel pa pone mundu riba su kabes pa prepará un reunion pa duna informashon i diskutí ku e Sekretario di Estado ulandes, sra. Ank Bijleveld, ku ta na Kòrsou pa supuestamente otro motibunan. Kiko ta e interes di e Sekretario di Estado relashoná ku e refineria den e fase aki ta un misterio kompleto. Ku otro palabra, un trayekto ku un falta total di transparensia”, asina e karta ta bisa.
Mirando e desaroyonan aki riba e aktitut di e gobièrnu aki pa loke ta trata informashonnan ku mester duna na e órgano ku ta representá pueblo di Kòrsou, oposishon ta hasi uso di reglamentu di órden pa pidi un reunion públiko ku e tema:
1. Maneho di Bestuurscollege enkuanto di Refineria di Kòrsou relashoná ku entre otro buskamentu di partnernan stratégiko.
2. Ròl di Gobièrnu Sentral i gobièrnu Ulandes, sea direkto òf indirekto den e proseso di buska partnernan stratégiko.
E petishon ta firma pa Gregory Damoen (Forsa Kòrsou), Norbert George(DP), Helmin Wiels (PS), Nelson Pierre (NPA) i Charles Cooper (MAN).