WILLEMSTAD - E kompania Canada Post International a transferí un suma di 13 mion florin ayera pa Gobièrnu di Antia komo parti di un akuerdo pa terminashon di e kontrakt di hür di 30 aña ku e kompania kanades a terminá despues di apénas 5 aña.
Promé minister Emily de Jongh-Elhage a pone su firma bou di e dokumentunan final pa terminá e relashon kontraktual di Gobièrnu di Antia ku Canada Post International Ltd (CPIL).
Despues di lunanan di negosiashonnan, e partidonan a yega na un akuerdo pa terminá e relashon. E akuerdo ta enserá ku CPIL ta pasa di un banda tur akshon di Post N.V. Nobo pa Gobièrnu di Antia. Di otro banda CPIL a bai di akuerdo pa paga un suma di 13 mion florin pa terminashon di e kontrakt. A base di e transakshon aki Gobièrnu di Antia a bolbe bira doño kompleto di Post na Antia. Gobièrnu di Antia a bisa ku mesora despues ku a firma e dokumentunan CPIL a pasa e suma di 13 mion florin pa Gobièrnu di Antia. Ku esei tambe a kontradesí informashonnan ku tabata sirkulá ku ainda mester bai negoshá un gran kantidat di punto pendiente. Ku e loke a firma awor aki a pone un fin definitivo na loke mester a bira un ehèmpel klásiko di un bunita proseso di privatisashon na Antia. Yegada di Canada Post sinembargo a resultá den resultadonan miksto. Tabatin bon momentunan pa Post N.V. pero tambe momentunan ku no ta tur hende tabata di akuerdo ku e desaroyonan na e kompania. Tabatin diferente akshon por ehèmpel den kua a denunsia no solamente supuesto arogansia di gerensia kanades di e kompania pero tambe e benefisionan ekstraordinario ku nan a haña. Anke ku terminashon di e akuerdo ku Canada Post ta un desapunto, Gobièrnu di Antia ta satisfecho ku e dil ku a sera bilateralmente sin ku tabata nesesario pa akudí na arbitrahe ku lo tabata largu i kostoso.
Gobièrnu di Antia no a bisa kiko ta bai pasa ku e suma di 13 mion florin ku e finalisashon di e akuerdo a trese den kaha di Gobièrnu, sea ku e ta bai pa e medionan general di Gobièrnu (ku tin hopi mester) òf ku ta hinka e sèn den aktividatnan di Post N.V. Reportadamente e kompania kanades a laga un retraso grandi atras den mantenshon di ekipo i infrastruktura di Post N.V.
Riba e pòrtrèt por mira e momentu ku promé minister De Jongh-Elhage ta firma e dokumentunan pa terminá e kontrakt ku Canada Post International.