A-Port proponé komo kandidato pa keda aprobá

WILLEMSTAD – Den e deliberashonnan pa haña un partner nobo, Alterra Partners a presentá A-Port komo potensial kandidato pa kumpra e akshonnan di Curaçao Aiport Partners (CAP). No a konsiderá kandidatura di Schiphol ku den pasado ya kaba a demostrá interes pero un biaha mas a laga e konsorsio ulandes for di e promé eskoho. Schiphol ta aktivo kaba na e aeropuertonan di Aruba i Boneiru i a mustra hopi interes pa aeropuerto di Kòrsou. Aparentemente un di e konsiderashonnan ta ku aeropuerto di Kòrsou kier keda kompetivo den nos region, inkluyendo ku esun di Aruba.
LA PRENSA tin entendí ku e último palabra pa loke ta trata e desishon pa no konsiderá Schiphol no ta bisá ainda. Aparentemente tin un koriente polítiko, entre otro den PAR, ku ta bisa ku si ta papiando di un reino ulandes di kon no duna preferensia na un konsorsio den reino ulandes.
Alterra Partners sinembargo a presentá A-Port komo prospekto pa kumpra e akshonnan di Curaçao Airport Partners (CAP). Den un komunikado Curaçao Airport Holding ta bisa ku den último dianan e promé deliberashonnan a tuma lugá entre gerensia di Curaçao Airport Holding (CAH), Alterra Partners i A-Port. Di gran importansia ta ku e business plan di e grupo interesá ta koinsidí ku e vishon di término largu di Holding i Teritorio Insular pa aeropuerto Hato di Kòrsou, asina e komunikado ta bisa.
E komunikado ta splika ku dia 1 di ougùstùs 2003 outoridatnan lokal a firma un konvenio di 30 aña ku CAP kaminda Alterra Partners tin 51% di e akshonnan, Trim Invest 39% i Janssen de Jong Construction 10%. Na 2005 Alterra Partners a laga sa ku nan ke hala bèk for di CAP pa motibu di otro prioridat i nan a buska otro interesado riba merkado internashonal. Atraves di un proseso ku a dura mas ku un aña, resientemente Alterra Partners a selektá A-Port komo prospekto pa kumpra su akshonnan. A-Port ta konsistí di Unique (Zürich Airport) di Suisa, Camargo Correa di Brazil i IDC di Chile.
Unique ta manehá aeropuerto di Zürich na Suisa i na 2007 nan a atendé mas ku 20 mion pasahero i 360 mil tòn di karga. Nan eksperensia enorme i nan bon reputashon a resultá den diferente rekonosementu internashonal, manera resientemente esnan di ‘Airport Council International’ komo e di dos mihó aeropuerto di Europa i komo number 3 na mundu. IDC ta un kompania Chileño pa maneho di aeropuerto, ku huntu ku Unique ta dirigí na mantenshon i eksplotashon di aeropuerto i kompania relatá na Sur Amérika. Camargo Correa ta un di e konglomerashonnan komersial mas grandi i prominente di Brazil, lantá na 1939, ku ta aktivo den e ramonan di infrastruktura, propiedat inmóbil i semènt. E grupo ta manehá aeropuertonan na Chile, Hondúras, Colombia i Bangalore na India.
E kontrato entre CAH i CAP, ku un durashon 30 aña pa maneho i desaroyo di e aeropuerto di Kòrsou, ta laga e posibilidat habrí pa un kambio interino di akshonista. Pero den un kaso asina Teritorio Insular di Kòrsou i CAH mester haña e oportunidat pa evaluá si e grupo nobo komo partner stratégiko ta kumpli ku loke a stipulá di antemano komo kriterio pa un desaroyo ekilibrá i di término largu pa Kòrsou su aeropuerto. E grupo selektá mester tin un bon reputashon i kumpli ku normanan finansiero, i un rekisito ta tambe ku nan tin eksperensia ku aeropuerto i negoshinan relatá den e region aki.
Djamars último e representantenan di e tres gruponan aki, aktuando komo A-Port, a bin Kòrsou pa nan promé deliberashonnan. Nan a duna un presentashon pa Gezaghebber Lisa Dindial, Diputado Eugène Rhuggenaath di desaroyo ekonómiko i direktor di CAH Clift Christiaan. Den e dianan ku a sigui e representantenan a reuní ku gerensia di CAH pa interkambiá dato i palabrá mas spesífiko e proseso pa nan haña lus bèrdè. Esei lo tuma su tempu. Si partidonan yega na un akuerdo dentro di 3 luna, lo dura sigur 3 luna mas pa formalisá tur e palabrashonnan atraves di e kanalnan gubernamental. E resultado final mester karga aprobashon di Gobièrnu insular. E último dianan aki e deliberashonnan a bai den un bon ambiente. Partidonan envolví mester palabrá ainda ki dia i na unda nan ta interkambiá mas dato i ta sigui negoshá, asina e komunikado ta bisa.